Super User

Super User

Venenatis vitae, justo. Nullam dictum felis eu pede mollis pretium. Integer tincidunt. Cras dapibus. Vivamus elementum semper nisi. Aenean vulputate eleifend tellus. Aenean leo ligula

Сайт URL-ы: http://www.joomshaper.com
Сенбі, 06 Қаңтар 2018 00:00

Жастар кеші

Жаңа жыл қарсаңында Аса ауылындағы орталық алаңда аудан әкімдігінің «Жастар ресурстық орталығының» қызметкерлері аудан жастарына арналған «Қош келдің, Жаңа жыл!» атты мерекелік кеш өткізді. Аудандық Мәдениет үйінің музыка жетекшісі Ғарифулла Лұқмановтың әуелеткен әнімен басталған кеште жастар хормен ортаға Аяз ата мен Ақшақарды шақырып, шырша шамын жақты. Тауық жылын жылы лебіздерімен шығарып салып, Ит жылын қарсы алған жастар барлығы бірге шеңбер болып, шыршаны айнала биледі. Аяз атаға тақпақтар айтып беріп, тәтті сыйлықтар алды. Орталық ұйымдастырған лотерея ойынына қатысып, бағалы сыйлықтарға ие болды. Сахнадан жас өнерпаздардың әндерін тыңдап, билеген билерін тамашалады.
Соңынан аталмыш орталықтың директоры Маханбет Рақымжанов аудандағы мүмкіндігі шектеулі балаларға әлеуметтік сыйқалталар табыс етіп, ата-аналардың алғысына бөленді.
Мерекелік кештің қызықты өтуіне аудандық Мәдениет үйінің қызметкерлері, Ю.Гагарин атындағы орта мектептің мұғалімдері өз үлесін қосты.
Ильяс Қалыбеков,
«Шұғыла».

Өткен жылға лайықты баға беріп, болашаққа тың қадам жасайтын, адамзат баласына рухани серпіліс беретін, жарқын өмірге жол сілтейтін айтулы мереке бұл.
2017 жыл еліміз үшін берекелі әрі жемісті жыл болды. Тарих қойнауына еніп бара жатқан Тауық жылына еш өкпе жоқ. Себебі, бұл жылы еліміз айтарлықтай мол жетістікке қол жеткізді. Еуразияның алып кеңістігінде әлемге танылған құдіретті мемлекет атанды. Шапағаттың шарапатын көрген Жамбыл ауданы да осындай жақсылықтардан кенде емес.
Елбасы Нұрсұлтан Назарбаевтың Қазақстан халқына арнаған дәстүрлі Жолдауында көрініс тапқан Қазақстанның үшінші жаңғыруы бастау алып, қоғамдық санаға серпіліс әкелген «Болашаққа бағдар: рухани жаңғыру» тарихи мақаласымен жарасымды жалғасын тапты. Даму мен өркендеуді көздеген Ұлт Жоспарының екінші жылы аса зор табыспен аяқталды.
Қуаныш пен шаттыққа, балғындардың бал күлкісіне толы думанды күні, яғни 31 желтоқсанда орталық алаңға жиналған көпшілік жеті қазынаның бірі саналатын Ит жылын ерекше ықыласпен қарсы алды. Көңіл тебірентер «Жыр думан» дуэтінің «Жаңа жыл» әнінен кейін сахнаға көтерілген аудан әкімі Бақыт Қазанбасов аудан халқын Жаңа жыл мерекесімен құттықтады.
– Сіздерді төрімізге шыққалы тұрған Жаңа жылмен шын жүректен құттықтаймын. Өтіп бара жатқан жыл ауданымыз үшін де табысты болды деп сеніммен айтуға негіз бар. Жылды әлеуметтік-экономикалық даму тұрғысында оң көрсеткіштермен қорытындылап отырмыз...
Барлық жетістік – сіздердің ынта-жігерлеріңіз бен еңбектеріңіздің нәтижесі, бейбітшілік пен тұрақтылықтың, ұлтаралық және конфессияаралық келісімнің жемісі. Біз мұны бәрінен де биік қоямыз. Келе жатқан жылда да осы мақсатта қызмет ете бермекпіз. Жаңа 2018 жылы елімізде тыныштық, әлемде бейбітшілік, әрбір отбасында шаттық пен қуаныш болсын! Ортақ шаңырағымыздың жарқын келешегі үшін еңбектеніп жүрген барша жамбылдықтарға амандық пен мол жақсылық тілеймін, – дегені сол еді аспанға атылған отшашулар көздің жауын алып, ерекше назар аудартты. Қызылды жасылды отшашуларды тамашалаған жұрттың қуанышы олардың дауыстап қошемет көрсетуінен байқалып тұрды.
Бұдан кейін сахнада өнер көрсеткен Бауыржан Момышұлы атындағы орта мектептің ұжымы ескі жылды есіркеп, жаңа жылды кәдесыймен қарсы алды. Аяз ата мен Ақшақар көпшілікке ізгі тілектерін айтып, бүлдіршіндерге сыйлықтар үлестірді. Сонымен қатар аудандық Мәдениет үйі жанынан құрылған «Дарын» халықтық театры «Төрлет, Жаңа жыл!» атты көрініс қойса, «Сәуле» балабақшасының ұжымы «Жап-жаңа жыл» атты қойылым ұсынды. Ал, бүкіл аң атаулы жиналып, жасыл шыршаны безендіріп, Тауық жылын шығарып салған «Балдырған» балабақшасының қойылымы ең әсерлі және көңілді шықты.
Көпшілікті мерекемен құттықтаған аудан әкімінің орынбасары Үміткен Найманова «Жаңа 2018 жыл» атты аудандық мерекеде керемет көрініс көрсеткені үшін Б.Момышұлы, Жеңістің 30 жылдығы атындағы орта мектептер мен «Сәуле», «Балдырған» балабақшаларын және сахна сыртында «Частушка» айтып, орыс халқының биін билеген Ю.Гагарин атындағы орта мектепті арнайы дипломдармен марапаттады.
Мереке аудандық Мәдениет үйі әншілерінің әсем әндерімен жалғасын тапты.
Жаңа жылды біз іргесі берік, мемлекеттігі бекем, аты әлемге танылған қуатты ел ретінде қарсы алдық. Осының барлығы Мемлекет басшысы Нұрсұлтан Назарбаевтың сара саясатының жеңісі мен жемісі деп білеміз.

Мақсат ЖҰМАБАЕВ,
«Шұғыла».

Жұма, 29 Желтоқсан 2017 00:00

Тарихтың тағдырлы көшінде

Біз ұзына бойы тарихымызда Ұлы далада небір қиындықтарды басымыздан кешірген, сұрапыл соғыстарды, жойқын жортуылдарды өткерген, сан рет қирап, сан рет бой түзеген, “тарихтың тағдырлы көші” дейтін ұзақ жолда жақсыны да, жаманды да көрген, салтанатты да өмір сүрген, хандары алтын сарайларда да тұрған, алтын тақта да отырған, іргелес елдермен бейбіт өмір сүре де білген елміз.
Тауқыметті соншама көп кешкен, тағдыры аянышты – езіліп-егілген, жабығып жапа шеккен, тарығып-зарыққан халық жер бетінде екеу болса, соның біреуі – қазақ. Сондай сұмдықтардың кесірінен қазақ кезінде атамекенін тастап, тоз-тоз болып жан сауғалауға да мәжбүр болды. Кеңпейіл, аңқау қазақтың мал-жаны тәркіленіп, ашаршылыққа душар болды. Зұлматтың құрығына түсті. Өзгенің тарихын өзімізге теліп оқыдық. Хандарымыз бен билеріміз, бектеріміз бен батырларымыз әжуаға, күлкіге, мазаққа айналды. Ұлт ретінде жер бетінен жойылып кете жаздадық. Ойыңа түссе зығырданыңды қайнататын, досың түгілі жауыңа да тілемейтін осындай қорлықты, сұмдықты басымыздан кешкен, тарихқа есесі кеткен елміз. Қазақтың “Еділді келіп алғаны – етекке қолды салғаны, Жайықты келіп алғаны – жағаға қолды салғаны” деп зарлағаны; “Әдіра қалғыр Үш Қиян” деп Мұрат ақынның күйзелгені; “Бас-басына би болған өңкей қиқым, Мінеки, бұзған жоқ па елдің сиқын” деп Абайдың қабырғасы қайысатыны осы тұс еді. “Дәуір алмасып жатқанда өмір сүрме”, – дейді екен қытайлар. Бүгінгі ұрпақтың өмірі дәуір мен дәуір, ғасыр мен ғасыр алмасып, заман өзгеріп жатқан тұсқа тура келді.
 Сенесіз бе, сенбейсіз бе? Аз уақыттың ішінде осы байтақ далада бұрын-соңды болмаған бүтіндей жаңа мемлекет – Тәуелсіз Қазақстан елі көш түзеді. Осы Ұлы көшті Нұрсұлтан Әбішұлы Назарбаев бастады. Ол ел тізгінін алмағайып, аумалы-төкпелі, ең қиын кезеңде қолына алған еді, тарихтың да, тағдырдың да сынынан абыроймен өтіп, халқын да қыл көпірден аман алып шықты. Оның теңдесі жоқ осы қаһармандығын, даналығын кейінгі ұрпақтың келешекке аңыз етіп жеткізетіндігінде еш күмәнім жоқ.
Сан ұрпақ аңсаған, мыңдаған жылдар бойы армандаған тәуелсіздікке қол жеткіздік – ел болдық. Тәуелсіздік алған жылдары мемлекет өзінен өзі орнай салғандай, өзінен өзі дами беретіндей даурығысып, қалпағымызды аспанға лақтырып, қуанышымыз қойнымызға сыймады. Сын сағатында, алмағайып заманда екі өмір, екі дүние, екі дәуір арпалысқа түскен шақта Нұрсұлтан Назарбаев осындай қадамға барды. Ештеңеден, ешкімнен қаймыққан жоқ. Қалай барды? Неге сенді? Кімге сенді? Бұл арасы ол кезде тек оның өзіне ғана мәлім еді. Қандай да бір шешім қабылдағанда, нендей бір істі бастағанда Елбасы, үнемі халыққа сеніп, халқына арқа сүйеп келеді. Президентті қолтығынан демеген де, демейтін де, қолдаған да, қолдайтын да – өзінің туған халқы. Біз бұрын толыққанды мемлекет орнатпаған, желбіретіп ту тікпеген, астана салмаған, Орда тұрғызбаған ел едік. Енді міне, Елордалы, Ақордалы, Елбасылы ел болдық, осының бәрін де көрдік, бәріне де куә болдық, мақтаныш сезіміне бөлендік. Елордамыз бүгінде халықаралық қатынастардың да астанасына айнала бастады. Астана салу былай тұрсын, сортаң, қу тақыр даламыз да бүгін жайқалған орманға айнала бастады. Байтақ Қазақстанды орманға, жасыл елге айналдырамын деген Елбасының “Жасыл ел” атты  жобасы “Мәңгілік ел” орнатамыз деген байырғы Түркі қағанаты заманындағы бабаларымыздың асыл мұратын еске салады.
Елбасын көп ретте Абылай ханмен салыстырып жатады. Сөз жоқ, Алаштың айбыны болған Абылай халық жадында, ел тарихында мәңгілік қалады. Дана қайраткер, кемел тұлғаның: “Үш жүздің басын қоссам, қала салсам, сөйтіп көшіп-қонған жұртымды ел етсем” деген арманы асқақ болатын. Абылайдың сол арманын жүзеге асырған, аманатқа адал болған адам – тағы да сол Нұрсұлтан Назарбаев. “Тымақ – төбесінен, ел төресінен тозады”, – дейді халық. Құдайға шүкір, қазақтың тымағы да бүтін, төресі де төрінде.
Еліміздің талантты да алғыр жастарын “Болашақ” бағдарламасымен шетелде оқытып алуға жол ашты. Нәтижеде қазір көптеген технологияның құлағында ойнайтын ойы оралымды, ақылы зерек жастар елдің басқару жүйесінде, ғылыми зерттеу институттарында, өндіріс ошақтарында білек түріп жұмыс жасауда. “Мәдени мұраны” кезең-кезеңге бөліп, қыруар қаржы шығарып, ол қаржыны қандай көздерден алып, қалай жаратуды да өзі белгіледі. Дүниенің ақпарат құралдары: “Өзге елдер ат ізін салмаған бастама”, “Ұлттық құндылықтың қайта түлеуі”, “Тәуелсіздіктің алғышартының игі қадамы” деп дүрілдетіп жазып жатты. Расында ғой! Көп ел 1999 жылғы экономикалық құнсыздану құйынынан, 2008 жылдан басталған дүниелік дағдарыстан қиналып, апшысы қуырылып жатқанда – керісінше, Қазақстан экономикалық шайқалысқа төтеп бере отырып, бабалар ізін, қасиетті тірі сөзін түгендеуді жалғастыра берді.
Елбасының бастамасымен «Адамзатты ядролық қарудың алапат қаупінен құтқарудың» мейлінше өзектілігі жөнінде көптеген басқосулар өтті. Біздің еліміздің аумағында атмосфералық, жер үстілік және жер астылық және «бейбітшілік мақсатында» делінген барлығы 500-дей сынақ өткізілді. Бұл – ядролық қару пайда болғаннан бері әлемде жүзеге асырылған барлық сынақтардың тең жартысы. 2006 жылдың қыркүйегінде біз аймақтағы басқа елдермен бірге Орталық Азияны ядросыз аймақ деп жариялаған Семей келісіміне қол қойдық. Қазақстан бірінші болып ядролық сынақтарға толық және сөзсіз тыйым салу актісін жүзеге асырды. Оған Қазақстан ең алғашқылардың бірі болып қол қойды. Бұл істің басы-қасында, әрине, Елбасымыз Нұрсұлтан Назарбаев жүрді. 
Еліміздің қол жеткізген үлкен жетістіктерінің бірі – «EXPO-2017» халықаралық көрмесі. Біз үшін Халықаралық көрмелер бюросына мүше 160 мемлекеттің басым көпшілігі дауыс берді. Небір алпауыт мемлекеттерінің ішінен Қазақстанды таңдауына көп күш салған – Елбасымыз Нұрсұлтан Назарбаев.
Президентіміз еліміздің әлемдік деңгейге шығуына себепші болып, халқының дамуы жолында аянбай тер төгіп келеді. Тәуелсіздігімізді баянды етті. Ауыр әрі абыройлы асудан астық. Ел алдындағы аса жауапты міндетті абыроймен орындаған. Елбасы – Алланың қазаққа берген сыйы.
Аяулым ӘБІЛДАЕВА,
Шайқорық орта мектебінің түлегі, «Алтын белгі» иегері, С.Демирел атындағы университеттің І курс білімгері.

Жұма, 29 Желтоқсан 2017 00:00

Салмақты семинар

Жамбыл ауданы әкімі аппаратының персоналды басқару бөлімшесінің ұйымдастыруымен 28 желтоқсан күні аудан әкімі аппаратының үлкен мәжіліс залында ауылдық округ әкімдерінің, аудан әкімдігі бөлімдері мен мекеме-ұйым басшыларының қатысуымен семинар-кеңес өткізілді.
Семинар барысында аудан әкімі аппаратының персоналды басқару бөлімшесінің басшысы Ж.Оспанова Қазақстан Республикасының мемлекеттік қызмет, сыбайлас жемқорлыққа қарсы іс-қимыл саласындағы заңнамасын, Әдеп кодексін сақтау мәселелері және мемлекеттік қызметшілерді қайта даярлау, біліктілігін арттыру оқу-семинарына енгізілген өзгерістер, мемлекеттік қызметшілердің жылдық бағалау қорытындысы бойынша баяндама жасады.
Бөлімше басшысы Қазақстан Респуб­ликасының 2015 жылғы 18 қарашадағы «Сыбайлас жемқорлыққа қарсы іс-қимыл туралы» Заңының 12-бабына және Қазақстан Республикасының 2015 жылғы 23 қарашадағы «Қазақстан Республикасының мемлекеттік қызметі туралы» Заңының 50-бабы 1-тармағы 17) тармақшасына сәйкес мемлекеттік қызметшілерге қызметтік өкілеттіктерін орындау барысында сыйлықтар қабылдауға тыйым салынатынын, алдағы мереке күндері аталған мәселеге қатысты тиісті шаралар қабылдап, мекеме қызметкерлерімен түсіндіру жұмыстарын жүргізіп, сыйлықтар түскен жағдайда қорға тапсыруды ұйымдастыру қажет екендігін айтты.
ҚР «Қазақстан Республикасының мемлекеттік қызметі туралы» Заңының 13-бабы 7-тармағына және ҚР «Сыбайлас жемқорлыққа қарсы іс-қимыл туралы» Заңының 14-бабына, 15-бабының 1-тармағына сәйкес, жауапты мемлекеттік лауазымды атқаратын адамдарға, мемлекеттік функцияларды орындауға уәкілеттік берілген адамдарға, мемлекеттік функцияларды орындауға уәкілеттік берілген адамдарға теңестірілген адамдарға, лауазымды адамдарға, егер мүдделер қақтығысы орын алған болса, лауазымдық міндеттерін жүзеге асыруға тыйым салынатынын, бұл ретте жоғарыда көрсетілген адамдар мүдделер қақтығысын болдырмау және шешу бойынша шаралар қабылдауға тиіс екенін, мүдделер қақтығысын болдырмау және реттеу жөніндегі шараларды қасақана қабылдамау тәртіптік теріс қылық болып табылатынын, алдағы мереке күндері қызметтік көліктермен аудан аумағынан тыс басқа облысқа және аудандарға іссапарларға шығуға тыйым салынатынын ескертті.

Жұма, 29 Желтоқсан 2017 00:00

Әлеуметтік көмек көрсетті

Жаңа жыл мерекесі қарсаңында Қаракемер ауылдық округінің әкімі Ердос Бейсенов округ аумағында тұратын мүмкіндігі шектеулі жандар мен аз қамтылған және көпбалалы аналарға әлеуметтік сыйқалта ұсынып, 10 отбасыға әлеуметтік көмек көрсетті. Округ әкімі күнбағыс майы, шай, ұн, қант, конфет, вермишель және басқа да азық-түлік толтырылған әлеуметтік сыйқалтаны мүмкіндігі шектеулі жандар мен аз қамтылған және көпбалалы отбасылардың үйлеріне арнайы кіріп табыстады. Оларды келе жатқан Жаңа жыл мейрамымен құттықтап, өзі де алғысқа бөленді.
Ердос Елібайұлы алдағы уақытта да көмекті қажет ететін ауылдастарына көмек бермек.

Жұма, 29 Желтоқсан 2017 00:00

100 балғынға сыйлық таратылды

Жаңа жыл мейрамы күн санап жақындап келеді. Расында, бұл күн – бөбектердің де, ересектердің де сүйікті мерекесі. Ертегіге сенбесек те, жүрегіміздің түкпірінде Жаңа жылдан бір сиқырды күтіп, бақыт тілейтініміз бар.
Мереке қарсаңында ауданда мүмкіндігі шектеулі балаларға арналған қайырымдылық шарасы өтті. Нақтырақ айтсақ, аудан әкімдігі жұмыспен қамту және әлеуметтік бағдарламалар бөлімінің мамандары ауданға қарасты ауыл­дық округтердегі кембағал жандар­ды үйіне мерекемен құттықтап барып, өздерімен бірге әкелген сыйқалталарын табыс етті. Оларға сыйлықтарды мамандармен келген Аяз ата табыстады.
Бұл күні аталған бөлімнің ауыл­дық округтердегі мамандары жалпы саны 100 балаға сыйлық таратты.
Ильяс Қалыбеков,
«Шұғыла».

Жұма, 29 Желтоқсан 2017 00:00

Маңызды мәселе талқыланды

Бейсенбіде аудан әкімдігінің кіші мәжіліс залында координациялық кеңес өтті. Жергілікті құқық қорғау органдарының өкілдері, ауылдық округтердің әкімдері қатысқан кеңеске аудан әкімінің орынбасары Ерлан Қыдыралыұлы төрағалық жасады.
Кеңесте «Талас» шекара комендатурасының коменданты Юрий Богомаз бен Қызылқайнар ауылдық округінің әкімі Зайнилда Сматов баяндама жасады. Олар биыл округ аумағында орын алған жағдайлар әлі күнге дейін жалғасып жатқанын, осы орайда жергілікті атқарушы органдар бірлесіп шекара аумағындағы құқық бұзушылықтың алдын алу үшін тиісті шаралар қабылдау қеректігін алға тартты. Шекара аумағынан заңсыз мал алып өту, заңсыз өткен малдың ветеринариялық бақылаудан өтпеуі, малға чиптің салынбауы секілді өзекті мәселелерге кеңінен тоқталып, заңды тұрғыда оның зардаптары қандай болатыны туралы тарқата айтты.
Координациялық кеңесті қорытындылаған Ерлан Қыдыралыұлы шекара аумағында орналасқан жергілікті халықтың шекара режимін сақтау, олардың шекарадан заңсыз мал алып өтуіне қарсы әрекет ету мәселелерін қызу талқылады.
Ильяс Қалыбеков,
«Шұғыла».

Жұма, 29 Желтоқсан 2017 00:00

Қуанса, бала қуансын

Жаңа жыл қарсаңында мектеп оқушыларына арнап шырша мерекесін ұйымдастырған аудан әкімі Бақыт Қазанбасов:
– Балалар – болашағымыз. Олардан ешкім сырын да, жырын да, сыйлығын да, тілегін де жасырып қалмақ емес. Бүгін сіздермен жүздесіп отырсақ, ертең малшылардың балаларымен кездесіп, жаңажылдық сыйқалта ұсынбақпыз. Қуанса, балалар қуансын, – деген.
Аудан басшысы қызмет бабымен малшылар ауылына бара алмаса да, ол кісінің ыстық сәлемін, текті тілегін, тәттіге толы сыйқалтасын арқалай жолға шыққан аудан әкімінің орынбасары Ерлан Қыдыралыұлы, аудан әкімдігі ауыл шаруашылығы және ветеринария бөлімдерінің басшылары Аманалы Құрбанов пен Сәкен Нұржаубаев, аудандық қоғамдық кеңестің төрағасы, «Пионер» өндірістік кооперативінің төрағасы Алпысбай Жұмахановпен бірге біз де жолға шыққанбыз. Жолда бізге Жамбыл облысы әкімдігі ветеринария басқармасының бөлім басшысы Төрехан Қойлыбаев та қосылған. Ол да аудан басшыларымен ниеттес, бір жағы мал қыстату науқанының барысын көзбен көріп қайтпақ.
Күн ұясынан енді көтерілген сәтте-ақ құм жиегіне іліккенбіз. Көліктегілердің бәрінің де ойы малшы балаларын қуанышқа бөлеу.
– Балалар сіздерді асыға күтіп отыр. Өйткені, олар аудан басшысының жаңажылдық сыйқалта әкелетінін біледі, – деді «Пионер» өндірістік кооперативінің төрағасы Алпысбай Жұмаханов.
Расында, балалар ата-ағаларын жаңа жыл мерекесі жақындаған сайын күтеді. Себебі, бұл үрдіс талай жылдан бері қалыптасқан. Сол тұста бала болып, аудан басшылары әкелген сыйқалтадан дәм татқан Сандыбай Сәрсенбаевтың өзі бүгінде әкенің құт таяғын ұстаған аға шопан.
Алдымен құм жиегіне орна­ласқан «Нұралиев» және «Мейір­жан» шаруа қожалықтары малшы­ларының үйіне барған топ аудан әкімінің сыйқалтасын тапсырды.
Негізі, Мойынқұм өңірінде ауданымыздың 60-қа жуық малшысы жылқы, мүйізді ірі қара мен қой-ешкі қыстатып отырғанын ескере отырып, әр малшының үйінде орта есеппен екі баладан бар деп ұғынсақ, 120-ға жуық бала аудан басшыларының алдынан шығады екен.
Бұл күні «Пионер» өндірістік кооперативінің төрағасы Алпысбай Жұмалыұлы да шопандарының балаларына жаңажылдық сыйқалталарын ала шыққан.
Сол күні балалардың қуанғанын көрсеңіз. Әрине, қуанса, балалар қуансын.

Дүйсенбек ОРМАНОВ,
«Шұғыла».

Жұма, 29 Желтоқсан 2017 00:00

Кеңейтілген отырыс өтті

«Нұр Отан» партиясы Жамбыл аудандық филиалы Саяси кеңесі Бюросының кеңейтілген отырысы партия аудандық филиалының төрағасы Бақыт Қазанбасовтың төрағалығымен өтті.
Аудандық мәслихаттың хатшысы Рүстем Бегалиев, партия аудандық филиалы төрағасының бірінші орынбасары Нұрлан Несіпбеков, аудан әкімінің орынбасарлары Үміткен Найманова мен Ерлан Қыдыралыұлы, партия аудандық филиалы Саяси кеңесінің мүшелері, партиялық бақылау комиссиясының мүшелері, бастауыш партия ұйымда­ры­ның жетекшілері, БАҚ өкіл­дері қатысқан отырыста аудан­дық аурухананың бас дәрігері Алтай Саурықовтың баяндамасы тыңдалды.
Қазақстан Республикасының денсаулық сақтау саласын дамытудың 2016-2017 жылдарға арналған «Денсаулық» мемлекеттік бағдарламасының Жамбыл ауданында орындалуы туралы баяндаған Алтай Мұхтарұлы медицина саласының жұмысына кеңінен тоқталып, нақты деректерді слайд арқылы көрсетті. Сала қызметіне қатысты пікір білдірген Бақыт Алпысбайұлы биылғы көрсеткіштердің былтырғыдан жақсы екенін атап өтті.
Бұл мәселе бойынша Саяси кеңес Бюросы халық денсаулығын нығайтуда санитарлық игілікті қамтамасыз ету негізінде алдын алу факторлары мен дұрыс тамақтануды және салауатты өмір салтына ынта­лан­дыруды насихаттау, медици­налық қызмет көрсетудің тиімді де қолжетімді жүйесін құру, эконо­микалық тиімділікті арттыра оты­рып, сапалы медициналық қыз­мет көрсетуді қамтамасыз ету жолда­рын ұсыну туралы қаулы қабылдады.
Бюро отырысында сонымен қатар күн тәртібіндегі келесі мәселелер бойынша – «Нұр Отан» партиясы аудандық филиалы Саяси кеңесі Бюросы мүшелерінің функционалдық міндеттер бөлінісін бекіту туралы, Саяси кеңес мүшелерін бастауыш партия ұйымдарына бекіту туралы, партия аудандық филиалының 2018 жылдың І жартыжылдығына арналған жұмыс жоспарын бекіту туралы, партиялық бақылау комиссиясының құрамы мен төрағасын бекіту туралы, сыбай­лас жемқорлыққа қарсы іс-қимыл жөніндегі қоғамдық кеңестің құрамы мен төрағасын бекіту туралы, партия аудандық филиалының 2018 жылдың І жартыжылдығына арналған желілік кестесін бекіту туралы, ақпараттық-насихаттық топтың құрамын бекіту туралы, партия аудандық филиалының 2018 жылдың І жартыжылдығына арналған медиа-жоспарын бекіту туралы, партияның аудандық мәслихаттағы депутаттық фракциясы мүшелерінің партия аудандық филиалындағы қоғамдық қабылдауының 2018 жылға арналған кестесін бекіту туралы қаулылар қабылданды.

Аудан әкімі Бақыт Қазанбасовтың төрағалығымен өткен аудан әкімдігінің мәжілісінде негізгі мәселе ретінде аудан әкімі аппаратының «Әкімдік бөлімдері мен ауылдық округ әкімі аппараттарындағы орындаушылық тәртіп туралы» хабарлама талқыланды.
Ауылдық округ әкімі аппараттары мен аудан әкімдігі бөлімдеріндегі іс жүргізу – қызметтік хаттарды, жеке және заңды тұлғалардың өтініш-арыздарын, бақылауда тұрған нормативтік-құқықтық актілерді рәсімдеу, қабылдау, тіркеу және олардың орындалуын бақылау ҚР «Әкімшілік рәсімдер туралы», «Жеке және заңды тұлғалардың өтініштерін қарау тәртібі туралы» Заңдарына, аудан әкімі аппаратында, ауылдық округ әкімі аппараттарында және әкімдік бөлімдерінде құжаттама жасау­дың және құжаттаманы басқарудың қағи­далары талаптарына сәйкес жүргізілуде.
Барлық мемлекеттік мекемелер өз қызметтерін жылдық және тоқсандық жұмыс жоспарларына сәйкес орындайды. 2017 жылға арналған іс-номенклатуралары аудандық мұрағатпен келісіліп, бекітілген.
Ауылдық округтерде кіріс және шығыс құжаттары кәртішкелік есеппен, ал бөлімдерде журналдық жүйемен жүргізіледі. Мөрлері, мөртабандары, фирмалық бланкілері жаңа үлгіде дайындалған, тоқсан сайын бүлінген бланкілер бойынша жою актілері бар, барлық құжаттар – мемлекеттік тілде. Келіп түскен құжаттар кіріске алынған, есеп кәртішкелеріне орындалу туралы мәліметтері көрсетіліп, орындаушының қолы қойылған. Шығыс құжаттарына арнайы есеп кәртішкесі толтырылып, қай мекемеге жіберілгені көрсетіліп, ауылдық округ әкімдері мен бөлім басшыларының қолымен расталған. Жеке және заңды тұлғалардың өтініштері кіріске алынып, ауыл әкімінің және бөлім басшысының бұрыштамаларына сәйкес орындаушыға жіберілген. Қағида талаптарына сәйкес, келіп түскен өтініштерге мерзімінде жауабы берілген, есептік кәртішкелері мен журналдарда орындалғандығы жөнінде толық ақпарат көрсетілген. Ауылдық округ әкімі аппаратының ғимараттарында азаматтардың арыздары мен шағымдарына арналған жәшіктер орнатылған. Ауыл әкімдері мен бөлім басшыларының азаматтарды жеке сұрақтармен қабылдау кестесі көрнекті жерде ілінген және көрсетілген мерзімдерге сәйкес қабылдау жүргізілген.
Дегенмен аудан әкімінің аппараты зерделеген ауылдық округ әкімі аппараттары және аудан әкімдігінің бөлімдерінде іс жүргізу жұмыстары бойынша кемшіліктер де орын алғаны анықталды. Жекелеген мекемелерде кейбір құжаттар тіркеуге дұрыс алынбаған, қабылдау кәртішкелеріне өтініштің орындалуы туралы белгі қойылмаған, азаматтарды жеке қабылдау кестелері сақталмаған.
Ендігі жерде ағымдағы жылдың жоспарында осы орындаушылық тәртіп, «Айқын» бағдарламасы, Е-әкімдік, Е-қорғаныш, электронды цифрлы қолтаңбаға толығымен жұмыс жасауға, лотос-нотес бағдарла­масы бойынша білікті де білімді жауапты мемлекеттік қызметкерге жүктеу қажеттілігін ескеруіміз керек. Бұл тұрғыда іс қағаздарын жүргізетін мамандарды құқықтық оқыту, біліктілігін арттыру, өздерінің функционалдық міндеттеріне жауапкершілікпен қарауына мекемелердің бірінші бас­шы­ла­ры тарапынан бақылау болуы қажет.
Хабарламада сондай-ақ мемле­кеттік-құқықтық мәселелер, аудан көлемінде сыбайлас жемқорлыққа қарсы күрес жөніндегі 2017 жылға арналған жоспардың орындалуы, мемлекеттік қызмет көрсету тура­лы толық ақпарат берілді. Зерделеу барысында аудан әкімдігі бөлімдері мен ауылдық округ әкімі аппараттарының іс жүргізуге және мемлекеттік қызмет көрсетуге жауапты қызметкерлеріне нақты тәжірибелік көмектер көрсетіліп, кеңестер берілгені айтылды.

Серіктестер