Материалы отфильтрованы по дате: Сәуір 2018
Сенбі, 28 Сәуір 2018 00:00

Кітап – дәуір айнасы

Кітап – білімнің қайнар көзі, ақылдың бұлағы. Қоғам мен еліміздің өркенін өсіруде орасан зор пайда келтіретін рухани қазына – кітап екені даусыз. «Артық білім кітапта, ерінбей оқып көруге», – деп ұлы ақын Абай бекер айтпаса керек-ті. Кітап адамзаттың ақылшысы, досы, сырласы бола алады.

Бейсенбі күні орталық алаңда Елбасының «Болашаққа бағдар: рухани жаңғыру» бағдарламалық мақаласы аясында және Халықаралық кітап және авторлық құқық күніне орай «Кітап – дәуір айнасы» атты мерекелік кеш өтті. Аудандық орталық кітапхана ұйымдастырған кешке жергілікті ақын Байтанағали Төлентаев, аудандық «Шұғыла-Радуга» газеті­нің тілшілері Дүйсенбек Орманов, Құрбанәлі Шахабай және кітапха­на­ның тұрақты оқырмандары қатысты.
Шара шымылдығы Ақбұлым ауылының кітапханашысы Айжан Жанабаева әуелеткен «Бүлдірген» әнімен түрілді. Одан соң Байтанағали Төлентаев, Дүйсенбек Орманов, Құрбанәлі Шахабай сөз алып, кітаптың адам өміріндегі маңызына тоқталып, жырдан шашу шашты. «Бір ел – бір кітап» акциясының шеруі де көпшілік көңілінен шықты. Аталған акция 2007 жылдан бері бастау алып, бүгінде жастардың әдебиетке деген қызығушылығын арттыруда үлкен рөл атқаруда.
Сондай-ақ кітапхана қызметкерлері сахналаған «Түлкі, қоян, қасқыр, жолбарыс, аю» ертегісі жас оқырмандарды әдемі әсерге бөлеп, қуанышқа кенелтті. Шара барысында кітап көрмелеріне шолу жасалып, көркем әдебиеттер таныстырылды. Сонымен қатар, кітапханаға бірнеше жылдан бері үзбей келіп тұратын оқырмандар арнайы сый-сияпаттарға ие болды. Кеш соңы арнайы ұйымдастырылған флешмобпен қорытындыланды.
Кітапқа деген құштарлықты ояту бұл тек кітапханашының ғана жұмысы емес, әрбір зиялы қауым өкілінің міндеті, азаматтық борышы. Еліміздің әрбір азаматы кітаппен дос болса, Отанымыз озық ойлы мемлекеттердің қатарына қосылары сөзсіз. Осы кеш бәрімізге соны тағы бір мәрте аңғартқандай болды.

Мадина Құлшымбаева,
аудандық орталық кітапхананың библиографы.

Сенбі, 28 Сәуір 2018 00:00

Қаратаудағы шаттық

Еліміздің тау мен тасы, өзені мен көлі, қаласы мен даласы тұнып тұрған тарих. Сол тарихымызды құрметтеп, өскелең ұрпақтың бойына сіңіру – парызымыз.
Жуырда Елбасының «Болашаққа бағдар: рухани жаңғыру» атты бағдарламалық мақаласы аясында Т.Рысқұлов атындағы орта мектептің директоры Асылбек Қонаров бастаған ұжым мүшелері есте қалар жұлдызды сәтті туғызып, тамаша кездесу кешін өткізді.
Сол күні шағын ауылда шаттыққа толы той болды. Алыс-жақындағы ағайындар, яғни, осы мектептің әр жылдардағы түлектері бас қосты. Шындығында, бұл күн олар үшін де, ауыл тұрғындары үшін де ұмытылмас сәттерімен есте қалды. Ауыл әжелері мен өнерлі өрендер жырдан шашу шашып, қонақтарға әдемі әсер сыйлады.
Қонақтар демекші, «Қазақ» телефильмінің бас продюсері, «Жастар» арнасының бас директоры Ильяс Ысқақов бастаған елге сыйлы азаматтардың арасында ақын да, заңгер де, ішкі істер органының қызметкері де, саясаткер де, мұғалімдер де, шаруашылық басшысы да, диқаншы мен көкпаршы, бейнеттің зейнетін көріп жүрген ата-апалар да болды.
Аузын ашса ақ тілектері ақтарылған қонақтардың осы кездесуді ұйымдастырушыларға алғыстан басқа айтары жоқ болды. Сол ризашылықтың айғағы болар, әйелдер жағы ауылдың ардақты аналарының иығына ақ орамал жауып жатса, ерлер де құрметтің белгісі ретінде ала келген сый-сияпаттарын мектеп ұжымына тапсырып жатты.
Сонда осы мектептің түлегі, ақын, филолог Темірлан Жорабай:
Қаратау – қасиетті төрім менің,
Алыстан қандай ыстық көрінгенің.
Сенің мөлдір суыңнан бір татпасам,
Мәңгілікке қанбайды шөлім менің.

Қаратау, қасиетті құндағым-ау,
Көңілді сыйғыза алмай жырға мынау.
Құшақтап әр төбең менен тасыңды,
Аунай кеткім келіп тұр құмға мынау.

Жаһанда жер бар ма екен артық сенен,
Даладай кеңіп тыныс, балқып денем.
Ауласын әрбір үйдің көзбен шолып,
Ауылдың көшесімен тартып келем... – деп тебіренді.
Бұл сағыныштың сазы екені даусыз. Осында отырғандардың бәрі де мұнда асығып жеткені анық. Олар да аядай ауылын, ондағы туған-туыс бауырларын Темірланша сағынғандары байқалды.
– Біз кездесу болады деген хабарды естісімен осында жетуге асықтық. Өйткені біз сіздерді, ауылымызды сағындық. Ауыл ағаларының ғибратқа толы әңгімесін тыңдауға, жастарға үлгі-өнеге болуға келдік, – деген Ильяс Башарұлының сөзін өзгелер де қоштаған.
Мектеп ұжымы ұйым­дастырған шарада сөз алған аудан әкімдігі білім бөлімінің бас маманы Әлия Омарова кеш қонақтары мен мектеп ұжымына және оқушыларға алғысын білдірді.

Дүйсенбек Орманов,
«Шұғыла».

Сенбі, 28 Сәуір 2018 00:00

Көңілге қонды, жүрекке жетті

Елбасының «Президенттің бес әлеуметтік бастамасы» атты Үндеуі ертеңгі күнге деген асқақ үмітке қанат бітіріп, жарқын болашаққа сендірді. Мемлекет басшысының бұл Үндеуінде қоғамды елеңдеткен көптеген әлеуметтік мәселер шешімін тапты. Әсіресе, әрбір отбасына баспана алудың зор мүмкіндігі туып отыр. Бүгінгі күнге дейін Елбасының сарабдал саясатының арқасында қаншама отбасы баспанамен қамтамасыз етілді. Дегенмен, әлі де үйсіз жүрген қауымның қарасы қалың. Сол үшінде Елбасы 7-20-25 бағдарламасын ұсынды. Аталған бағдарлама сәтімен жүзеге асса, баспанаға зәру талай шаңырақ қоныс тойын тойлап, қуанышқа кенелері сөзсіз. Үндеуде көтерілген тағы бір бастама – жалақысы төмен жұмысшылардың еңбекақысын көбейту үшін олардың салық жүктемесін азайту және білім сапасын арттырып, студент жастардың жатақханадағы жағдайын жақсарту. Бұл екі бастама да қазіргі таңда өзекті болып отырған мәселелер. Білімді жастарға қолдау көрсетіп, оларды демеу жөнінде Президентіміз тәуелсіздіктің алғашқы жылдарынан бастап-ақ айтып келеді. Сол сөзі енді, міне, Үндеуде де көрініс тапты. Елдің өркендеп, алға қадам басуы үшін білім сапасының артып, саналы жастардың көбеюі қашанда маңызды орынға ие. Үндеудегі төртінші бастама шағын несие беруді көбейту жайына арналды. Бұл күнде өз кәсібін ашып, шаруасын дөңгелеткісі келетіндердің саны өте көп. Енді сондай жандарға қолдау көрсетіп, көмек берсе нұр үстіне нұр болар еді. Ал, бесінші бастама елді газбен қамтамасыз етуді жалғастыру туралы болды. Егемендік алып, ел еңсесі тіктелген сәттен бастап Үкімет барлық өңірді газбен қамтамасыз етуді қолға алғаны белгілі. Дегенмен, көгілдір отынның тапшылығынан қиындық көріп жүрген елдімекендер әлі де аз емес. Осы бастама арқылы сол өңірлер түбегейлі газбен қамтамасыз етілсе, бұқара халықтың қуанышында шек болмас.
Елбасының биылғы Үндеуі кез келген қазақстандықтың көңіліне қонып, жүрегіне жеткені даусыз.
Айман Бөлегенова,
Қызылқайнар ауылдық округі әкімі аппаратының бас маманы.

Бөлім:  Елбасы
Сенбі, 28 Сәуір 2018 00:00

Келісімге қол қойылды

Жамбыл ауданы әкімдігінің, жұмыскерлердің аудандық бірлестіктері және жұмыс берушілердің аудандық бірлестіктерінің арасындағы 2018-2020 жылдарға арналған келісімге қол қою жиналысына аудан әкімі Бақыт Қазанбасов, Қазақстандық салалық білім және ғылым қызметкерлері кәсіподағы Жамбыл аудандық ұйымының төрағасы Ернар Тәжібаев, аудандық кәсіпкерлер палатасының директоры Лиза Азизбекова, аудан әкімі аппаратының басшысы Жомарт Телеуов қатысты. Жиналысты ашып, жүргізген Бақыт Алпысбайұлы 31 қаңтарда ҚР Үкіметі, республикалық жұмыс берушілер бірлестіктері мен республикалық кәсіподақтар бірлестіктері арасында 2018-2020 жылдарға арналған бас келісімге және наурыз айында облыс әкімдігі, облыстық кәсіподақтар орталығы мен облыстық кәсіпкерлер палатасы арасындағы 2018-2020 жылдарға арналған келісімге қол қойылғанын айтып, бүгінгі келісімнің мән-маңызына тоқталды.
2018-2020 жылдарға арналған республикалық бас келісімді және Жамбыл облыстық келісімді басшылыққа алып, Жамбыл ауданы әкімдігінің, жұмыскерлердің аудандық бірлестіктері және жұмыс берушілердің аудандық бірлестіктері арасындағы 2018-2020 жылдарға арналып жасалған келісімге Жамбыл ауданы әкімдігі атынан аудан әкімі Бақыт Қазанбасов, жұмыскерлердің аудандық бірлестігі атынан Қазақстандық салалық білім және ғылым қызметкерлері кәсіподағы Жамбыл аудандық ұйымының төрағасы Ернар Тәжібаев және жұмыс берушілер бірлестіктері атынан аудандық кәсіпкерлер палатасының директоры Лиза Азизбекова қол қойды.
Келісім 7 бөлімнен тұрады.
Жамбыл ауданы әкімдігінің, жұмыскерлердің аудандық бірлестіктері және жұмыс берушілердің аудандық бірлестіктерінің арасындағы 2018-2020 жылдарға арналған келісім ауданның әлеуметтік-экономикалық дамуына үлес қоспақ.

Бөлім:  Саясат
Сәрсебі, 25 Сәуір 2018 00:00

Ардагерлердің жүлдесі

Жуырда Елбасының «Болашаққа бағдар: рухани жаңғыру» бағдарламалық мақаласы аясында және Ұлы Жеңістің 73 жылдығына орай ардагерлер арасында дәстүрлі облыстық турнир өтті. Салауатты өмір салтын насихаттап, ардагерлер арасында спорт түрлерін дамытуды мақсат еткен турнирге аудандық ардагерлер кеңесінің төрағасы Бақыт Сырлыбаев бастаған аудан ардагерлерінен жасақталған құрама команда да қатысып қайтты.
Облыс ардагерлері спорттың 7 түрінен бақ сынады. Өңір ардагерлері бұл бәсекеден құр алақан қайтқан жоқ. Атап айтар болсақ, дойбы спортынан Разия Қырықбаева II орынға ие болса, тоғызқұмалақтан Райхан Туғанбаева, асық атудан Серік Қонаров тұғыр биігінің екінші сатысынан көрінді. Сонымен қатар, ардагерлер Шәмшібек Имашев, Ахмедәлі Абдықадыров, Бақыт Сырлыбаев, Бауыржан Бейсенбиев, Шайбек Қарсақов, Жолшыбек Бекменбетов, Қанат Исақов, Рауф Садықовтардан құралған волейбол командасы қарсылас шыдатпай бас жүлдені қанжығасына байлады. Сондай-ақ, Шәмшібек Имашев турнирдің ең үздік ойыншысы атанды. Аудан намысын қорғаған ардагерлер жалпыкомандалық есепте III орынға ие болып, дипломдармен және «Елу жылда – ел жаңа» қоғамдық бірлестігінің арнайы кубогымен марапатталды. 
Құрбанәлі Шахабай,
«Шұғыла».

3. Көлқұдықта тірлік көп
Пионерліктердің пәрменді ісіне, шұрайлы Шүректің шырайына риза көңіл танытқан біздің келесі тоқтаған тұсымыз «Көлқұдық» базында отырған «Нұралиев» шаруа қожалығына тән малшы Нұрлан Сүйінбаевтың үйі еді. Осындағы жайылымнан өріс тапқан асыл тұқымды ақбас бұқалардың қоңдылығынан-ақ Көлқұдықтағы тірліктің тиянақты екенін аңғару қиын емес. Тіпті, өрісте жүзге жуық түйетауық та жайылып жүр.
Келгендегі шаруамызды айтпай түсінген малшы Нұрлан Сүйінбаев: – Шаруа қожалығында жылқы да, ірі қара да, қой да бар. Басшымыз маған 62 бас асыл тұқымды ақбас бұқаларды сеніп тапсырған. Сол сенімнің үлесінен шығып жүрмін деп ойлаймын. Биыл қыс қатал болды. Жемшөп жеткілікті болған соң бағымымдағы малдан шығынға ұшыраған жоқ. Қазір де, көріп тұрғандарыңыздай, бұқаларым қоңдылығын жоғалтпай келеді. Тірлік жасаймын деген адамға жұмыс көп екен. Бір айлыққа өмір сүру қиын. Жұбайым екеуміз көп ойланып барып, түйетауық өсіруге ден қойдық. Екі жыл болды осы тірлікпен де айналысып келеміз. О баста 16 түйетауығым бар еді, қазір 200-ге жуықтады. Күзге дейін бұдан да көбейетін шығар деп үміттеніп отырмын. Өйткені, күрік болған түйетауыққа жұмыртқа бастырып жатырмын. Әр түйетауықтың астында 20 жұмыртқа жатыр. Құдай қаласа, енді 20-25 күннен кейін балапан ашып, түйетауық басы 1000 басқа жететін шығар. Өткен жылы 80 бас түйетауықты базарға шығарып саттым. Әр түйетауық 12-15 мың теңге арасында сатылды. Есептей беріңіз қанша пайда тапқанымды. «Жатқанға жан жуымайды» деген рас екен. Түйетауық өсірмесем, осыншама қаражатты маған кім береді? Биыл күзде тағы сатамын, – деген ол үй құстары қонақтайтын қора-жаймен таныстыра бастады.
Нұрланның тірлігіне көңіліміз толған. Оның өзі айтпақшы бір айлыққа қарап отыру мүмкін еместігіне көзіміз жетті. Нұрекеңнің тағы бір айтқаны, қыстық азықтары қой, жылқы еті емес, тек түйетауық еті мен жұмыртқасы болыпты. Сойылған түйетауықтың жүнін де кәдеге асырып, құс жастық етіп оны да сатылымға шығарады екен. Осыдан кейін Нұрланды іскер, малсақ демей көріңіз.
Аудан әкімі Бақыт Қазанбасов пен оның орынбасары Ерлан Қыдыралыұлы малшы Нұрлан Сүйінбаевтың ісіне сүйсіне қарап: – Тірліктің тінін жалғап, істің көзін, жұмыстың жайын білетін Нұрланның бұл тірлігінен өзгелер де үлгі алса құба-құп болар еді, – деді.
Расында, шаруашылық пен жеке шаруасын қатар алып жүрген Нұрланға қалай риза болмассың. Осыдан кейін Мойынқұм өңіріндегі Көлқұдықта тірлік көп демеске ләжіміз қалмаған.
Дүйсенбек Орманов,
«Шұғыла».
Аса – Мойынқұм – Аса

Сәрсебі, 25 Сәуір 2018 00:00

Шегіртке қаупінің алдын алып...

Соңғы кездері елімізге зиянкес шегірткелердің ша­буыл қаупі төніп тұр дегенді жиі естіп, көріп те жүрміз. Мұндай жәндіктер шабуылының егістіктер үшін қаншалықты қатерлі екенін мамандар мен шаруалар жақсы біледі. Сондықтан, бүгінде бұл үйірлі шегірткелерге қарсы химиялық күрес шаралары қолға алына бастады.

Негізінде шегірткелер үйірлі және саяқ тектестерге бөлінеді. Соның ішінде үйірлі шегірткелер аса қауіпті зиянкес болып табылады. Олардың өмір сүру орны ауыл шаруашылығы егістіктері мен жайылым жерлер болып келеді де, жем іздеу барысында олар алқаптарға ауысуы да мүмкін. Демек, шегірткенің қай түрі болмасын, зиянкестер егістік пен жайылымдарда көбеймей тұрып, алдын ала жоспарланған жұмыстарды шұғыл бастаған жөн.
Дәл осы мақсатта өткен сенбі күні ауданымызға арнайы келген ҚР Ауыл шаруашылығының вице-министрі Гүлмира Исаева 2018 жылғы ауыл шаруашылығы дақылдарының егістіктеріндегі ерекше қауіпті зиянды организмдерге жүргізілген тексеру барысындағы мониторингтермен танысып, зиянкестерге қарсы атқарылатын жұмыстардың барысын көрді. Вице-министрмен бірге Агроөнеркәсіп кешендегі мемлекеттік инспекция комитетінің төрайымы Ажар Қаджыбекова, облыс әкімінің орынбасары Мәден Мұсаев, аудан әкімі Бақыт Қазанбасов және Байзақ, Сарысу, Талас аудандарының әкімдері, сала мамандары мен басқарма басшылары, тіпті зиянды организмдермен күрес жүргізуде бірнеше жыл еңбек өтілі бар құрметті қонақтар да болды. Олар әуелі жайылымнан шыға бастаған шегірткелер түрлерін, биылдыққа бөлінген қаражат пен атқарылатын жұмыстардың жобасын, сонымен қатар мұндағы тізіліп тұрған агрегаттар, ұшақтар, техника түрлерін көріп, бағасын берді.
Бұдан кейін облыс әкімінің орынбасары Мәден Мұсаев көпшілікпен жиын өткізді. Жиында Мәден Тоқтарбайұлы шегірткелерге қарсы жұмыс жасайтын арнайы облыстық штабтар құрылғанын, оны өзі басқаратынын айта келе, штабтарға бекітілген аудан әкімдеріне жұмысшыларға барлық жағдайды қолайлы етіп ұйымдастыруды тапсырды.
Жиында сөз алған Ажар Елемесқызы шегірткелерге қарсы өткен жылы атқарылған жұмыстарды саралай келе, жіберілген кемшіліктерді қайталамауға, оған себепкер шаруашылық мамандары мен сала жетекшілері алдын ала қандай шара қолдану керектігін және жүйелі жұмыстардың нәтиже беруі үшін қолдан келгенше көмек беруге даяр екенін мәлім етті.
«Бүгінгі таңда жайылым жерлердің барлығын шегіртке басып кеткен. Оларға қарсы берілетін дәрілер мен улы химикаттарға шегірткелер үйренісіп, жылдан жылға көбеюде. Енді не істеуіміз керек және техникалар да өте ескі», «Қаражаттың жетіспеушілігінен жұмысымыз тоқтап қалып, уақыт жоғалтудамыз» деген мамандар мен жауапты тұлғалардың сан түрлі сұрақтарына вице-министр Гүлмира Исаева нақты жауаптар қайтарып, бірігіп жұмыс жасаудың маңыздылығына тоқталды.

Мақсат ЖҰМАБАЕВ,
«Шұғыла».

Бөлім:  Қоғам
Сенбі, 14 Сәуір 2018 00:00

Көшпелі семинар-тренинг

Сәрсенбі күні «Нұр Отан» партиясы аудандық филиалының мәжіліс залында «Қоғамдық қатынастар жүйесіндегі саяси билік» тақырыбында көшпелі семинар-тренинг өткізілді.
Әр ауданнан бастауыш партия ұйымдарының төрағалары мен мүшелері қатысқан басқосуда «Нұр Отан» партиясы Саяси менеджмент Академиясының аймақтық лекторы Ш.Кенжебаев Елбасы Нұрсұлтан Назарбаевтың «Төртінші өнеркәсіптік революция жағдайындағы дамудың жаңа мүмкіндіктері» атты Қазақстан халқына Жолдауындағы негізгі он бағытты кеңінен түсіндірді. Семинарда СМА-ның аймақтық лекторы, партия аудандық филиалы төрағасының бірінші орынбасары Н.Несіпбеков слайд арқылы «Цифрлы Қазақстан» мемлекеттік бағдарламасын іске асыру – елді табысты жаңғырту шарты» тақырыбында баяндама жасады.
Бұдан кейін Ш.Кенжебаев қоғамдық қатынастар жүйесіндегі саяси билік, саяси билік ұғымдары, белгілері, субъектілері мен типтері жайында түсіндіріп, қатысушылар тарапынан қойылған сауалдарға нақты жауаптар берді. Ал, лектор Н.Несіпбеков «кейспен» жұмыс жүргізіп, қатысушылардың ой-пікірін жасаған жұмыстары арқылы саралады.
Семинар соңында қатысу­шыларға тест парақтары таратылып, белсенді қатысқан бастауыш партия ұйымдарының төрағалары мен мүшелеріне сертификаттар табысталды.

Мақсат ЖҰМАБАЕВ,
«Шұғыла».

Бөлім:  Нұр Отан
Сенбі, 14 Сәуір 2018 00:00

Қызылша себігі басталды

«Көктемнің әр күні қарбаласқа толы» деген сөз рас. Қазір қай ауылға бармаңыз, бос жүрген жанды көрмейсіз. Бірі айыр, кетпенін арқалап егістік алқабына бет алып бара жатса, екіншісі жер жыртып, дән сеуіп әуре. Сол сайын далада жүрген диқан-механизаторлардың еңбегі өлшеусіз. Оларда тыным жоқ. Таңның атысынан күннің батысына дейін осында. Тіпті әр күн, әр сағатты тиімді пайдаланамыз деген ниетпен түннің бір уағына дейін тракторларының жарығымен тірліктерін тиянақтап жүр.
Осындай тірлікті атқарып жүрген Нуритдин Бегманов жетекшілік ететін «Қызылдихан» өндірістік кооперативінің диқандары күні кешеге дейін 420 гектарға жаздық арпа, 30 гектарға пияз, 4 гектарға ноқат егіп үлгерген. Оған ерте күзде 700 гектарға орналастырылған күздік бидайды, 2-3 жыл бұрын егілген 500 гектар жоңышқаны қосыңыз. 10-15 күннен кейін 100 гектарға егілетін жүгері мен 10 гектарға орналастырылатын бақша өнімдері тағы бар.
Қызылдиқандықтар үшін маңызды жұмыстардың бірі 100 гектарға қант қызылшасының тұқымын себу болатын. Бұл тұрғыда шаруашылық диқандары осыдан үш күн бұрын себік жұмысын бастап кеткен. Осы үш күн ішінде 50 гектарға Германиядан жеткізілген «Акация», «Виорика» сортты тұқымды қант зауыты арқылы алып, сеуіп үлгерді.
Қызылдиқандықтардың қарқынына риза көңіл танытқан аудан әкімінің орынбасары Ерлан Қыдыралыұлы: – Қант қызылшасын егудегі жоспарымыз биылғы жылға аудан бойынша 2000 гектар. 70-тен аса шаруа қожалықтары қызылша егуге ниеттеніп отыр. Алайда, кейбір шаруа қожалығының төрағалары қант зауытынан өткен жылы өткізген шикізаттар үшін төленетін қаражатты әлі күнге дейін ала алмай жүргенін алға тартып, биыл ексек, тағы да шығынға ұшыраймыз ба деп қынжылыс білдіруде. Сол үшін де олар қызылша себігін кешеуілдетіп отырған секілді. Бірақ, сыныққа сылтау іздемеген «Қызылдихан» өндірістік кооперативінің төрағасы Нуритдин Бегманов «қызылша себігін бүгіннен бастамасақ, ертең кеш болады» деген оймен қызылша жұмысын осыдан үш күн бұрын бастап кетті. Нуритдиннің бұл ісінен өзгелер үлгі алса керек. Негізі, аудан қылшашылары биыл Германияның «Акация», «Виорика», француздық «Авантаж», «Эйдар», «ФД Бункер», «Тиссерин» сорттарын егуді көздеп отыр. Биыл алынған өнімнің 8 теңгесін қант зауыты төлесе, Үкімет 12 теңге субсидия береді. Сондай-ақ, минералдық тыңайтқыш пен гербицидтерге де 50х50 пайыз есебінде субсидия төленеді. Жанар-жағармай да жеңілдетілген бағамен босатылады. Облыс, аудан әкімдерінің бақылауындағы қант қылылшасын өсіру жұмысы бір сәт те тоқтамауы қажет. Балтамырға бап керек. Сондықтан «Не ексең, соны орасың» деген қағиданы әрдайым есте ұстауға тиіспіз, – деді. 
Ерлан Қыдыралыұлының айтқанын ешкім теріске шығара алмас. Әр күнді пайдалана білген қызылдиқандықтар – шаруашылық төрағасының орынбасары Жақсынбек Жамансариев, механизаторлар Николай Ивкин, Қанат Майлыбаев, Қуаныш Жамансариев, Бекежан Қошайбаев себік жұмысын күн райы оң қабақ танытып тұрса, 4-5 күнде аяқтаймыз деп сеніммен айтып отыр.
Дүйсенбек Орманов,
«Шұғыла».

Сенбі, 14 Сәуір 2018 00:00

Болашаққа бес бағдар

Елбасы Нұрсұлтан Назарбаев наурыз айында халықтың әл-ауқатын арттыратын «Президенттің бес әлеуметтік бастамасы» атты үндеуін жариялады. Бес әлеуметтік бастаманың әрқайсысы халық үшін, әсіресе, жастар үшін үлкен берекенің бастауы болмақ.
Мемлекет басшысының «Әрбір отбасына баспана алудың жаңа мүмкіндіктерін беру» атты бірінші бастамасы әр жас отбасы үшін үлкен мүмкіндік туғызды. Қарапайым халықтың мүддесіне бағытталған екінші қадам – «Жалақысы төмен жұмысшылардың еңбекақысын көбейту үшін олардың салық жүктемесін азайту». Ел Президентінің жыл сайынғы Жолдауларының басым бағыттары жастармен тікелей байланысты. Келешегіміздің келбеті, болашағымыздың баянды болуы бүгінгі жастардын қолында. Өйткені олар – ертеңімізді жасайтын бүгініміз. Сондықтан да келешек ұрпақ сапалы білім, саналы тәлім-тәрбие алып, осы жолда еңбек етуіне жағдай жасалуы маңызды. Осы орайда бес бастаманың үшінші бағыты «Жоғары білім алудың қолжетімділігі мен сапасын арттырып, студент жастардың жатақханадағы жағдайын жақсарту» еліміздің одан әрі дамуына айтарлықтай үлесін қосары анық. Сонымен қатар, Елбасының төртінші бастамасы: «Шағын несие беруді көбейту» ауылдық өнірлерде шағын бизнестердің ашылуына, одан әрі дамуына зор үлесін қосады деп сенемін. «Елді газбен қамтамасыз етуді жалғастыру» бесінші бастамасы болашақта өндірістердің дамуына және экологиялық жағдайдың жақсаруына мүмкіндік туғызбақ.
Жандар Тоқсаба,
аудан әкімдігі «Жастар ресурстық орталығы» директорының орынбасары.

Бөлім:  Елбасы
Бет 1 -ші 3 беттен

Серіктестер