Материалы отфильтрованы по дате: Ақпан 2018
Сәрсебі, 21 Ақпан 2018 00:00

Ақбұлым – алтын бесігім

Өткен жылғы сәуір айындағы Елбасының «Болашаққа бағдар: рухани жаңғыру» атты мақаласы қазақ халқының мәдени тамырына бой ұруға және жастарды рухани жұтаңдықтан сақтайтын салмақты ойға жетелеуде. Осы мақаладағы «Туған жер» бағдарламасы болашақ ұрпақтың рухани азығына айналатыны сөзсіз. Туған жер дегеніміз – кіндік қаның тамған алтын бесік ауылың. Осындай терең де мағыналы түйінге қарасақ, қандай да бір ақыл-ой туындысы тек ұлтқа қызмет еткенде ғана құнды.
Бабаларымыздың данышпандығы да осында, ұрпақ тәрбиелеудің басты құралына айналған осындай ұлағатты кесім қай кезеңде болса да өз жемісін берген. Ата-бабаларымыздың сара жолын ұмыт қалдырған кейбір жастарымыз, айдың-күннің аманында басқа ағымның жетегінде кетіп, адасуының бірден-бір мәнісі осында деген ойда қаласың. Қалай болғанда да бабаларымыз қаншама қайғы-қасіретті, алмағайып заманды басынан өткерсе де, діні мен ділін берік ұстағанына таң қаласың. Туған жерді дәріптеп-насихаттау қасиетті қазақ тілі арқылы іске асатыны бәрімізге белгілі жәйт. Қазақтың ауызша тарихы – ел-жұртты, ұлт пен ұлысты танудың әліппесі, көнеден жеткен көне тарихымыздың айнымас айнасы. Жастарды атамекенінің тұнық тарихының мәйегімен ауыздандырмайынша біз еліміздің нағыз патриоттарын тәрбиелей алмаймыз.
Рухани жаңғыру барысында «Туған жер» бағдарламасы жалпы ұлттық патриотизмнің нағыз өзегіне айналуы үшін бабаларымыздан қалған көне асыл мұраларымызды, сонау ежелден бізге жеткен тарихи құндылықтарымызды жан-тәнімізбен қастерлеуіміз керек. Елбасының бағдарламалық мақаласы осыны меңзейді емес пе?
Бұл тұрғыда асыл қазынамызға жататын менің туған ауылым да жалпы ұлттың қасиетті рухани құндылықтарына жататын орынға айналуға толық құқылы деп есептеймін. Алдымен Ақбұлым деп аталу тарихына байланысты көне тарихқа үңілетін болсақ, II ғасырда қытай тарихшысы Сьюань-Цзань мынадай жазба қалдырған. Талас өзенінің жағасында «Долосы» сауда қаласы орналасқан (қытайлықтар Тараз қаласын осылай атаған). Ал, осы қаланың шығыс қақпасы жағында Талас өзенінің арғы беткейінде тау қыраттары етегіндегі 300-ге жақын шаңырағы бар үстін ақ тұман басып тұрған елді мекен бар деп жазып кеткен. Ол – біздің Ақбұлым ауылы. Осы жазбаға сүйенсек, күнгей Алатаудың төменгі сілеміндегі Ақтаудың етегіндегі Қамыстыбұлақ шатқалынан шыққан бұлақтан және Сарыбұлақтан аққан сулар қосылып бір тоған су болып ағып, Талас өзеніне құйылып отырған. Ықылым заманнан бері Ақбұлымның тұрғындары осы суды өз қажеттеріне пайдаланып келген, қазіргі кезде су аққан сай-саланың орны жатыр. Жылдың төрт мезгілінде таңғы уақытта бұлақтан аққан судың және Талас өзенінің буынан ауылды «ақ» бу басып, бұлыңғыр тартып тұрған, осыған байланысты «Ақбұлым» аталған.
Ақбұлым – көне мұраларға бай тарихи ауыл. Солтүстігінде «Жетітөбе», арыда «Ақыртас», оңтүстік-шығысында  «Ботамойнақ» пиктограммасы, «Қарауылтөбе», «Қарасай», «Қамыстыбұлақ» шатқалындағы тастарға салынған таңба бейнелер (петроглифтер), таңбалар мен сурет жазулар (пиктография), солтүстік-батысында «Төменгі Барысхан» қаласының орны, батысында жеті-сегіз шақырым жерде Тараз қаласы ауылымызды қоршап тұр. Ал, Қарасайдың аталуына шатқал толығымен қара гранит тастармен көмкерілгені себеп болған. Онда қола дәуірі кезеңіне жататын мыңдаған петроглифтерді кездестіруге болады.
Қамыстыбұлақ шатқалының табаны бұлақтан аққан судан әжептеуір көлге айналғанын көрдік. Ежелде бұл көлдің көлемі үлкен болып, айналасына қамыс өскен. Қамыстыбұлақ аталғаны осыдан. Бұл шатқалдан қола дәуірі кезеңінен бізге жеткен таңба, сурет жазулар мен ежелгі тарихи-мәдени мұралар сақталған. Олар көне замандағы ата-бабаларымыздың бүкіләлемдік мәдениетке қомақты үлес қосқан өркениетті халық болғанын дәлелдейді.  
   Ботамойнақ шатқалы ботаның мойнына ұқсас ирелеңдеп күнес жағына қарай созылған. Шaтқaлдың бoйымeн ұзыннaн-ұзaқ ecкi cүpлey жaтыp. Ocы cүpлey тay бeткeйiнe кeлiп тipeлeдi. Тay бeткeйiнiң coл жaғымен ciлeмe қыpaттapын бoйлaй oтыpып, тayдың мaңдaйынa шығaмыз. Қaтпap-қaтпap тacтapдың iшiндe жapық cызықшaғa ұқcac тap үңгipдiң ayзын көpeмiз. Бip aдaм зорға cығылыса кipep ayзы бар қapaңғы қaпac үңгipдiң iшiндe eкi жaқ қaбыpғaны бoйлaй төмeн ылдилaп түceтiн жoл бap. Қaбыpғaлapдa көптeгeн eжeлгi aдaмдapдың caлғaн жaзбa тaңбaлapы көптеп кeздeceдi. Бұлapдың қaй дәyipгe жaтaтындығын жәнe жaзy нeмece тaңбa eкeндiгiн aнықтay – ғaлымдapымыздың құзырындa.
Осындай тарихи мұралар бізге кімнен, қалай жетті? Халық бір күнде тумайды, тарихи кезеңдерді бастан өткере отырып, қалыптасу жолына түседі. Көне мұралардың ақиқатын ашып, оларды көзіміздің қарашығындай сақтап, келер ұрпаққа сол қалпында жеткізе білсек, бұл біздің тағылымы биік тарихымызды танығанымыз. Біз рухани санамызды осындай жауһар мұралармен жаңғыртпасақ, бабалар алдындағы парызымызды өтей алмағанымыз. Мәселе – сонда!
Түк білмей босқа өткен уақытың,
Өмірдің мәнісі жоқ бос емес пе?
Кең байтақ даламыздың тарихымен,
Жастарды тәрбиелеу  хош емес пе?
Бабалардың мұрасын танып білсек,
Рухани жаңғыруымыз осы емес-пе?..

Жамбыл Бесбаев,
ардагер ұстаз.
Ақбұлым ауылы.

Сәрсебі, 21 Ақпан 2018 00:00

Ойыншықтар табыс етілді

Жуырда «Айналайын» қоғамдық бірлестігінің мүшелері мен волонтер-білімгерлер аудандағы оңалту орталығында қайырымдылық іс-шарасын ұйымдастырды. Іс-шарада матадан жасалған жұмсақ ойыншықтардың жасалу технологиясы бойынша шеберлік сабағы өтті.
– Біз – Тараз қаласындағы педагогикалық колледж студенттеріміз. «Айналайын» орталығында болашақ мамандығымызға қажетті тәжірибеден өтуге келдік. Волонтер ретінде қайырымдылық шараларына қатысып, балалармен жұмыс жүргізген ұнады, – дейді волонтерлар Шапағат Сүйен, Аружан Ералиева, Айжан Айтқұл.
Іс-шара соңында оңалту орталығының балаларына волонтерлар жасаған 25 жұмсақ ойыншық табыс етілді.
Күнзипа Ситалиева,
«Шұғыла».

Бөлім:  Қайырымдылық
Сәрсебі, 21 Ақпан 2018 00:00

Тәрбие сағаты өтті

Жуырда Аса ауылындағы «Психологиялық-педогогикалық түзету кабинетінде» психолог маман Назира Шарипова тәрбие сағатын өткізді. Оқушылар тәрбие сағаты барысында «Қазақстан», «Салт-дәстүр», «Мәдени құндылықтар және өнер», «Ұлттық ойындар мен тағамдар» атты төрт топқа бөлініп, «Көк тудың желбірегені», «Қазақы дәстүрлер-ай», «Қара жорға», «Қазақы дастарханым» әндерін хормен шырқады. Психолог маманның ұлттық сананы, бәсекелік қабілетті, прагматизмді, ұлттық бірегейлікті сақтауды, ұлттық салт-дәстүрлеріміз бен жаңғыруды, білімнің салтанат құруын, мемлекетіміздің эволюциялық дамуын, сананың ашықтығын қамтыған дәрісіне құлақ түріп, өз ойларын жеткізді.
Соңынан оқушылар «Қазақтарды шетелдік қонақтарға таныстыру» атты бейнебаянды тамашалап, мазмұнын ауызша айтты.
Ильяс Қалыбеков,
«Шұғыла».

Сәрсебі, 21 Ақпан 2018 00:00

Әскери бөлімдегі басқосу

Елбасы Нұрсұлтан Назарбаевтың «Төртінші өнеркәсіптік революция жағдайындағы дамудың жаңа мүмкіндіктері» атты биылғы Жолдауында айтылған келелі мәселелер қоғамымызда кеңінен талқылануда. Жуырда 2035 әскери бөлімінде Жолдау жүктеген мақсат-міндеттерге байланысты жиын болып өтті. Жеке құрамның сарбаздары қатысқан басқосуда әскери бөлімнің командирі, подполковник Әмірбек Ақымбеков Мемлекет басшысының дәстүрлі Жолдауы егемен елімізді баянды болашаққа бастайтынын сөз етіп, биылғы жылдың басты құжатындағы негізгі 10 міндетке кеңінен тоқталды.
– Тәуелсіздікке қол жеткізген алғашқы жылдар еліміз үшін өте ауыр кезең болды. Бірақ, мемлекет тізгінін ұстаған кемеңгер Көшбасшы халқының қамы, елінің абыройы үшін небір тегеурінді тірлікті қолға алды. Елдің еңсесін көтеретін мемлекеттік бағдарламаларды қабылдап, дәстүрлі Жолдауын жариялауды бастады. Сөз жоқ, Елбасы Жолдауындағы тапсырмалардың орындалуы қазақ елінің мерейін тасытып, әлем елдері арасында абырой-беделін асырды,  – деді Әмірбек Ақымбеков.
Жиында өзге де қатысушылар құнды құжаттағы мәселелер бойынша өзара пікір алмасты.
И. Рыбин,
2035 әскери бөлім командирінің орынбасары, майор.

Бөлім:  Жолдау
Сәрсебі, 21 Ақпан 2018 00:00

Дәстүрлі турнир

Апта аяғында Ю.Гагарин атындағы орта мектептің спорт залында баскетболдан ерлер арасында Ауған соғысында қаза болғандарды еске алуға арналған аудандық турнир болып өтті. Дәстүрлі турнирді аудан әкімінің орынбасары Ерлан Қыдыралыұлы ашты.
– Ауғанстанда 10 жылға жуық уақытқа созылған сұрапыл соғыс мыңдаған адамның өмірін қиды. Майдан шебіне Кеңес одағынан 620 мың адам азаматтық борышын өтеуге аттанса, 22000 сарбаз біздің елден барды. Қазақстандық мыңға жуық жауынгер Ауған жерінде қаза тауып, тағы 21-і із-түзсіз жоғалды. Жамбыл ауданынан Ауған соғысына аттанған азаматтардың алтауы майданда қаза тапты. Жерлестеріміздің ерлігін мәңгі есте сақтап, ұрпақтан ұрпаққа жеткізу – біздің міндетіміз. Елі барда ерлер есімі ешқашан ұмытылмайды. Бүгінгі өткелі тұрған дәстүрлі турниріміз биыл 12-ші рет ұйымдастырылды. Барлық қатысушыларға сәттілік тілеймін, – деген Ерлан Қыдыралыұлы №1 орта мектептің дене шынықтыру пәнінің мұғалімдері Темірхан Құрматаев пен Жеңіс Бибазаровқа, спорт ардагері Роман Абдулаевқа «Нұр Отан» партиясы аудандық филиалының Алғыс хатын табыс етті.
Жылы лебіздер легін жалғаған аудандық Ауған соғысы ардагерлері кеңесінің төрағасы Дәуренбек Нұралиев, спорт ардагері Роман Абдуллаев аудан басшыларына, турнирді ұйымдастырған аудан әкімдігі дене шынықтыру және спорт бөлімінің басшысы Қайрат Ержігітовке рахмет айтып, қатысушыларға ақжарма тілектерін жеткізсе, мектеп оқушылары арнау өлеңдерін тарту етті.
Турнирдің бас төрешісі Темірхан Құрматаевтың нұсқауымен басталған жарыста ауылдық округтерден келген 10 құрама команда өзара екі топқа бөлініп, тартысты кездесулер өткізді. Топтарында бірінші және екінші орын алған командалар жартылай сында жолығып, жүлделі орындарды сарапқа салды.
Кешкісін аяқталған жарыста «Аса-1» командасы жеңімпаз атанса, «Аса-2» мен «Жалпақтөбе» құрамалары сәйкесінше екінші және үшінші орындарды иеленді.
Жеңімпаз бен жүлдегер командалардың баскетболшылары салтанатты жағдайда дипломмен, медальдармен, арнайы кубоктармен, бағалы сыйлықтармен марапатталды.

Ильяс Қалыбеков,
«Шұғыла».

Бөлім:  Спорт
Сенбі, 17 Ақпан 2018 00:00

Көшпелі көрме – ауданда

Елбасы Нұрсұлтан Назарбаевтың «Болашаққа бағдар: рухани жаңғыру» атты бағдарламалық мақаласындағы бағыттарды жүзеге асыру мақса­тында «Ежелгі Тараз ескерткіштері» тарихи-мәдени қорық-музейінің директоры Рустам Бекеновтің бастамасымен жылжымалы көрме ұйымдастырылуда.
Сәрсенбі күні 300-ден астам экспонаты бар жылжымалы көрмені аудандық Мәдениет үйі жанынан құрылған тарихи-өлкетану мұра­жайына қойды. Енді аудан тұрғындары он күн бой бұрынғы орталық базар астынан табылған құнды жәдігерлерді тамашалайтын болады.
– Көрмеде 7 жыл бойы жүргізілген қазба жұмыстарының нәтижесінде табылған тарихи экспонаттардың төрттен бір бөлігі: қыштан, қоладан, мыстан, күмістен жасалған құнды жәдігерлер тұрғындар назарына ұсынылып отыр. Соның ішінде, Берікқара қорғанынан табылған қыштан жасалған ыдыстар мен қоладан жасалған әшекей бұйымдар II-III ғасырға жатады. Сонымен қатар, ежелде білімнің символы ретінде қолданылып келген шырағдандар, Түргештер, Қараханидтер, Цинь дәуірінің мыс, күміс теңгелері, Х ғасырда ежелгі Тараз шаһарында пайдаланылған су жүйесінің қыш құбырлары да көрмеге қойылған, – деді «Ежелгі Тараз ескерткіштері»  тарихи-мәдени қорық-музейінің экскурсоводы Таңшолпан Жүзбаева.
Жылжымалы көрме бұған дейін Жаңатас, Қаратау тәрізді моноқалалар мен Т.Рысқұлов, Меркі аудандарында болды.

Күнзипа Ситалиева,
«Шұғыла».

Сенбі, 17 Ақпан 2018 00:00

Отты күндер ұмытылмайды

Ауған соғысы – мыңдаған жалынды жастың өмірін жалмап, талай шаңырақты ортасына түсір­ген қасіретті соғыс. Солақай саясат­тың кесірінен орын алған осы бір зұлматта қаншама ғұмыр қыршы­нынан қиылды, біреу баласынан, енді бірі бауырынан айырылды. Адамзатқа тажал әкелген бұл соғысқа лағынет айтып, қарғыс жаудырмаған жан кемде-кем.
Биыл Ауған жеріндегі қанқұйлы соғыстың аяқталғанына 29 жыл толды. Арада осыншама уақыт өтсе де, оның жаңғырығы әлі басылған жоқ. Соғыс салған жара, соғыс әкелген қайғы ұлынан айырылған ананың, бауырынан айырылған ағаның көкірегін әлі күнге сыздатады. Алайда, ерлерін қадірлейтін елі барда олардың есімдері ешқашан ұмытылмайды. Бұған біз ауғандық ардагерлердің құрметіне арналған аллеяда ұйымдас­тырылған митинг кезінде тағы да бір көз жеткіздік. Ержүрек батырларды еске алуға арналған митингте алдымен аудан әкімі Бақыт Қазанбасов, аудан әкімдігінің бөлімдері және мекеме-ұйым басшыларымен қатар, Ауған соғысының ардагерлері қаза болған қаруластарын еске алып, жауынгерлерге арналған ескерткішке гүл шоқтарын қойды. Бұдан кейін жат жерде опат болған жауынгер-интернационалистерді еске алу үшін 1 минуттық үнсіздік жарияланды. Осы бір үнсіздік жиналған қауымды терең ойға, ауыр мұңға жетеледі. Ардагерлердің жанарында шейіт болған қарулас­тарына деген сағыныш, отты күн­дердің естен кетпес естелігі тұрды.
Митингте сөз алған аудан әкімі Бақыт Қазанбасов мағыналы әңгіме қозғады.
– Халқымыз қашанда Отан алдындағы азаматтық борышына ақтық демі таусылғанша адал болған аяулы азаматтарының абыройын асқақтатып, беделін биіктете білген.
1979 жылы Кеңес әскерінің шектеулі контингенті Ауғанстанға кіріп, 10 жылға жуық соғыс жүргізді. Бүгін сол соғыс өртінің аяқталғанына 29 жыл толып отыр.
Он жылға созылған сұрапыл соғыс қаншама адамның өмірін қиды. Майдан шебіне Кеңес Одағынан 620 мың адам азаматтық борышын өтеуге аттанса, олардың 22 мыңы қазақстандық жауынгерлер болатын. Солардың бір мыңға жуығы Ауған жерінде қаза болып, тағы 21 жауынгер із-түссіз кетті.
Сертке берік қазақ жігіттері Отан алдында берген антын бұзбай­ды. Бозымдар жат елде мәңгі жер жас­танып, қан майданнан талай елім деп еңіреген ерлер туған жеріне табытпен оралғаны баршамызға мәлім. Олардың ішінде біздің ауданнан аттанған 6 жауынгер бар еді. Олар өмір қызығын енді ғана сезіне бастаған балғын жастар болатын. Ерлікті мәңгі есте сақтап, ұрпақтан-ұрпаққа жеткізу – біздің міндетіміз, – деген өңір басшысы Ауған ардагерлерін осы бір айтулы күнмен құттықтап, отбасыларына амандық, бақ-береке тіледі.
Мұнан кейін аудандық Ауған соғысы ардагерлері кеңесінің төрағасы Дәуренбек Нұралиев сөз алып, майдандас достарын күрсіне еске алды. «Тұтас бір ұрпақтың, дәуірдің трагедиясына айналған қарулы жанжалдың зардабын ешқа­шан ұмытпауымыз қажет», – деді кешегі интернационалист-жауын­гер, бүгінгі ардагер Дәуренбек Баешұлы.
Ізгі тілектер легін одан әрі Көлқайнар ауылдық округі арда­герлер кеңесінің төрағасы Амангелді Омаров жалғады. «Кешегі сұрапыл соғысқа қатысқан әрбір азаматтың ерлігін бүгінгі жастарға үлгі етуіміз керек», – деген Амангелді аға Ауған соғысының ардагерлерін осы бір мерейлі датамен құттықтады.
Ақжарма тілектерден соң орта­ға мектеп оқушылары Аяулым Жұмағұлова, Жұлдызай Теңгесбаева және Айбек Мекенқұловтар шығып, ардагерлерге арналған өлең шумақтарын тарту етті.
Митингке жиналған әр адамның көкейінде осы бір сұм соғысты өскелең ұрпақ көрмесе екен деген тілек тұрды. Мұны жасыру әсте мүмкін емес. Тарих жылнамасына қанмен жазылған Ауған соғысы ел жадынан өшпейтіні анық. Себебі, бұл соғыста қаншама өмір мәңгілікке үзілді. Ендеше, сол ерлердің есімін дәріптеу – бүгінгі бейбіт күннің бесігінде тербелген әрбір азаматтың қастерлі парызы.

Құрбанәлі Шахабай,
«Шұғыла».

Бөлім:  Қоғам

Сәрсен­біде ауданы­мызға жұмыс сапарымен арнайы келген Қазақстан Респуб­ликасы Президенті Әкім­шілігінің мемлекеттік бақылау және аумақтық-ұйымдастыру жұмысы бөлімінің мемлекеттік инспекторы Еркін Базарханов аудан әкімдігінің кіші мәжіліс залында тұрғындарды жеке сұрақтары бойынша қабылдау жүргізді.
Қабылдауға келген тұрғындардың сауалдары мен өтініштерін көңіл қоя тыңдаған Еркін Сеилханұлы нақты әрі түсінікті етіп жауап қайтарды.
Бұдан кейін инспектор аудандық емханаға бас сұғып, ондағы тіркеу бөлімінің қызметімен, амбулаториялық хирургия бөліміндегі, гепатит, бруцеллездарды тексеретін арнайы кабинеттердегі және рентген, биохимия бөлімдеріндегі аппараттардың жұмысымен танысты.
Көлқайнар ауылдық округі аумағындағы «Аса-Даму» құс фабрикасына аялдаған Еркін Сеилханұлы мұндағы өндірістің қарқынды жүріп жатқанын көріп, жұмысшыларға табыс тіледі.
Ауданымыздың тыныс-тіршілігімен танысқан мемлекеттік инспектор түс ауа аудан әкімі Бақыт Қазанбасовтың тұрғындар алдындағы жыл ішінде атқарған жұмыстары бойынша қорытынды есеп беру кездесуіне қатысты.

Мақсат ЖҰМАБАЕВ,
«Шұғыла».

Бөлім:  Саясат

Өңірде өркендеу бар

Аудан тұрғындары алдында 2017 жылды қорытындылаған аудан әкімі Бақыт Қазанбасов Елбасының «Төртінші өнеркәсіптік революция жағдайындағы дамудың жаңа мүмкіндіктері» атты Жолдауынан туындаған мақсат-міндеттерге тоқталып, ел экономикасының дамуына жамбылдықтар да өз үлестерін қосып отырғанын тілге тиек етті. Аудан әкімінің қорытынды есебі басталмас бұрын жиналған көпшілік аудандық Мәдениет үйінің кіреберіс дәлізіндегі көрмені тамашалады. Онда ауданның барлық саласының көрсеткіштері айшықты етіп қойылып, көрнекі көрмелер қатары сап түзеген. Стенділердегі әрбір салаға қатысты жетістіктерді көріп, өңірдің өркендегенін аңғару қиын емес еді. Ал, мәдениет ошағының оң қапталындағы аудан әкімдігінің білім бөліміне қарасты мектептердің өнерлі өрендерінің шебер қолдарынан шыққан сан алуан сәнді бұйымдар мен әшекейлер және тарихтан сыр шертетін сурет көрмесі көпшіліктің назарын аудартпай қоймады.
Кездесуге келген облыс әкімі Асқар Мырзахметов пен Қазақстан Республикасы Президенті Әкімшілігінің мемлекеттік бақылау және аумақтық-ұйымдастыру жұмысы бөлімінің мемлекеттік инспекторы Еркін Базарханов айналадағы игіліктерді тамашалап, аудан әкімінің қорытынды есебін аудан тұрғындарымен бірге тыңдады.
Аудан әкімі Бақыт Қазанбасовтың есепті баяндамасына сүйенсек, өткен жылы ауданда өнеркәсіп өнімі 8 млрд 744,3 млн теңгені құрап, 114 пайызға орындалған.
– Бұл аудандағы «Амангелді газ өңдеу зауыты» мен «КнауфГипсТараз», «Super Pharm», «БиномСртойДеталь» жауапкершілігі шектеулі серіктестіктерінің нәтижелі жұмысының көрсеткіші. «Бизнестің жол картасы-2020» бағдарламасы аясында 1 млрд 171 млн теңгеге 17 жоба іске асырылып, 105 жаңа жұмыс орны ашылды. Ауыл шаруашылығында да ілгерілеу бар. Агроқұрылымдарда өндірілген өнім көлемі 27 млрд 302,8 млн теңгеге жеткен. 2017 жылы ауданда 25 ауыл шаруашылығы кооперативі құрылды. «Агробизнес» бағдарламасы бойынша жылдық тапсырма артығымен орындалып, бағдарлама аясында 746 бас ірі қара малы, 1467 бас ұсақ мал, 294 бас жылқы сатып алынды. 17 ұңғыма қазылды. Ал, аудандағы құрылыс жұмыстары 22,8 пайызға артық орындалып, 5 млрд 621,6 млн теңгені құрады. Аудандық бюджеттен 1 млрд 083,3 млн теңге бөлініп, толығымен игерілді. Негізгі капиталға салынған инвестиция көлемі 23 млрд 701 млн теңгені құраса, бөлшек сауда тауар айналымының көлемі 2 млрд 726 млн теңгеге жетті. Аудандық бюджеттің кірісі 10 млрд 708,2 млн теңге көлемінде бекітілсе, ол қаржыны аса өзекті мәселеге жұмсау жоспарланып отыр, – деді Бақыт Алпысбайұлы.
Ал, «Өңірлерді дамыту» бағдарламасы аясында 71 млн 670 мың теңгеге 17 ауылдық округте 21 жоба іске асырылған. Аудан аумағындағы автомобиль жолдарын жөндеу де назардан тыс қалған емес. Өткен жылы аудандағы тасжолды күтіп ұстауға 35,5 млн теңге және аудандық мәндегі жолдарды жөндеуге 183,4 млн теңге бөлінген. Ауылішілік жолдарды жөндеуге 178,9 млн теңге бөлініп, бұл қаражатқа 19 ауылдың 29 көшесі жөндеуден өткен. «Өңірлерді дамыту» бағдарламасы бойынша 23,0 млн теңгеге 5 ауылдың 5 көшесі, жергілікті өзін-өзі басқару органдарына бөлінген трансферттер есебінен 20,8 млн теңгеге 8 ауылдың 13 көшесі жөнделген. Ауданда жұмыссыздық деңгейін төмендету шаралары да жемісін беруде. Нәтижелі жұмыспен қамтуды және жаппай кәсіпкерлікті дамытудың 2017-2021 жылдарға арналған бағдарламасы шеңберінде 2868 адам жұмысқа орналасқан. Былтыр тіркелген қылмыс саны 2016 жылмен салыстырғанда 12,3 пайызға төмендеген. Ауданда білім, денсаулық, мәдениет салаларында да көптеген мәселелер оң шешімін тапқан.
Аудан әкімінің есепті баяндамасынан кейін жарыссөзге шыққан Бесағаш ауылдық округі ардагерлер кеңесінің төрағасы Жетібай Бөрібеков аудан әкімінің жыл ішінде атқарған жұмысын жоғары бағалап, Түрксіб ауылындағы түйткілді мәселені қаузады. Яғни, Түрксіб ауылындағы 430 орындық А.Макаренко атындағы орта мектепте 980 бала оқып жүргенін, елді мекенге қосымша жаңа мектеп керек екенін жеткізді. Өрнек ауылдық ақсақалдар кеңесінің төрағасы Оңласын Атыхаев Өрнек-Ерназар, Өрнек-Тоғызтарау ауылдарын жалғайтын жол жөнделсе деген тілегін білдірді. Аудандық Ауған соғысы ардагерлерінің төрағасы Даурен Нұралиев аудан әкімі аппаратының ықпалымен екі Ауған соғысы ардагерінің үйіне тегін газ тартылып бергенін тілге тиек етіп, аудан әкіміне алғысын білдірді. Сонымен қатар, Б.Момышұлы атындағы орта мектептің жанындағы қаңырап тұрған ғимаратты қайта күрделі жөндеуден өткізіп, шығармашылық орталыққа айналдыруына ықпал етуін сұрады. Шайдана ауылының тұрғыны, ардагер-ұстаз Амангелді Қоңырбаев Шайдана мен Сеңгірбай ауылдарынан Пионердегі орта мектепке 120 оқушы ескі автобуспен қатынап жүргенін қозғады. Жамбыл бастауыш мектебінің мұғалімі 130 баланың аудан орталығына қатынап оқитынын айтып, ауылдан мектеп салынса деген тілегін білдірді. Шайқорық ауылының тұрғыны Рыскүл Нұрманова округтегі елді мекендерде инфрақұрылымның жоқтығын, әсіресе таза ауызсудың қинайтынын жасырып қалмады. «Эреке» шаруа қожалығының басшысы Нұржан Тасқожаев техникасы сай болса да, жаңбырлатып суару технологиясына тиісті қаржыны ала алмай жүргенін айтты. «Пионер» және «Қызыл-дихан» өндірістік кооперативінің төрағалары Алпысбай Жұмаханов пен Нуритдин Бегманов қант қызылшасын өсіруде кездесетін түйткілді мәселелерге тоқталды. Ауданның Құрметті азаматы Мақұлбек Байгелдиев Тараз қаласына кәріз жүйесін орнату мәселесін көтерді.
Жиынды қорытындылаған Асқар Исабекұлы Елбасының Жолдауынан туындаған міндеттер мен мемлекеттік бағдарламаның орындалуы бойынша ауданда бірқатар жұмыстар жүзеге асқанын тілге тиек етіп, ауданның әлеуметтік-экономикасын көтеру мақсатындағы жұмыстарды жандандыру керектігін баса айтты. Әсіресе, егін және мал шаруашылығын дамытуға бағытталған бағдарлама аясында жұмыс жасау керектігін, қант қызылшасын өсірудің барлық мәселелерін ауыл шаруашылығы мамандарымен, шаруа қожалық басшыларымен, қант зауытының директорларымен бірге кеңесіп шешетінін жеткізді.
Нұрасыл Сұлтанбаев,
«Шұғыла».

Бөлім:  Саясат

Өткен жұмада аудан әкімі Бақыт Қазанбасовтың ауылдық округ тұрғындары алдындағы есеп беру кездесулері Қаракемер және Аса ауылдық округтерінде өтті. «Нұр Отан» партиясы аудандық филиалы төрағасының бірінші орынбасары Нұрлан Несіпбеков, аудан әкімдігінің бөлімдері мен мекеме-ұйым басшылары қатысқан жиындарда өңір басшысымен бірге аталған округтердің әкімдері Ердос Бейсенов пен Бауыржан Қалшымбетов есеп берді. Өткен жылды қорытындылап, алдағы жұмыс жоспарымен таныстырған аудан және ауыл әкімдері тұрғындар тілегін тыңдап, ұсыныс-пікірлерін назарға алды.

Қаракемер

Тұрғындар тілегін айтты

Есепті кездесуде сөз алған Қаракемер ауылдық ардагерлер кеңесінің мүшесі А.Балқыбеков аудан және ауыл әкімінің есебін қанағаттанарлық деп бағалап, Қаракемер және Құмтиын ауылдарына газ құбырын тарту, Қаракемер ауылындағы ауызсу жүйесін жаңарту, Байтелі көшесін асфальттау секілді мәселелерді алға тартты. Құмтиындық ақсақал К.Керімбеков ауылдағы мал жайылымы мәселесін шешіп беруді өтінсе, Төле би атындағы орта мектептің мұғалімі Х.Оспанбекова тозығы жеткен мектеп терезелерін ауыстыру керектігін сөз етті.

Аса

Ескі жатақхана жөнделсе

Аудан әкімдігі «Жастар ресурстық орталығында» өткен аудан әкімінің есеп беру жиынына ауыл тұрғындары көптеп жиналды. Әуелі өңір басшысының баяндамасынан өткен жылы ауданда атқарылған жан жадыратар тірлікке көз жеткізген тұрғындар аудан орталығы – Аса ауылындағы шешімін таппай тұрған бірқатар істің беті бері қарағанын айтты. Жиында сөз алған Аса ауылдық ардагерлер кеңесінің төрағасы Р.Жапаров аудан және ауыл әкімінің есебін жоғары бағалады.
– Соңғы жылдары аудан орталығында біршама жұмыстар атқарылды. Ауылішілік жолдардың барлығы дерлік күрделі жөндеуден өтіп, асфальтталды. Көшелер жарықтандырылды. Тұрғындарға қажетті әлеуметтік нысандар бой көтеріп, тозығы жеткендер жөнделді. Көгілдір отын мен таза ауызсу құбыры тартылды, – деген қария биылғы қыс қыспаққа алғанын, қаңтардағы қара суықта табиғи газдың қысымы төмендеп, біраз тұрғынды әуреге салғанын айтты. Бір өкініштісі, бұл жылда қайталанатын жағдай екенін тілге тиек еткен қария қысымы төмен көшелерге қосымша шырпы орнатып беруін өтінді. Ал, зейнеткер Ү.Мусалиева білім берудегі жаңа реформаға байланысты сабақ кеш аяқталып, оқушылар түн жарымда қайтатынын, алайда мектепке апаратын кейбір көшеде жарық жоқ екенін айтып, осының оң шешім табуына ықпал етуін сұранды. Аудандық Ауған соғысы ардагерлері кеңесінің төрағасы Д.Нұралиев Б.Момышұлы атындағы орта мектептің жанындағы бос тұрған ескі жатақхананы күрделі жөндеуден өткізіп, халық игілігіне берсеңіздер деген тілегін білдірді.

Ильяс ҚАЛЫБЕКОВ,
«Шұғыла».

Бөлім:  Саясат
Бет 1 -ші 4 беттен

Серіктестер