Материалы отфильтрованы по дате: Қыркүйек 2017
Сенбі, 30 Қыркүйек 2017 00:00

8350 азаматқа екпе егіледі

Қазан айының 1-ші жұлдызынан бастап тұрғындарға тұмауға қарсы екпе егу науқаны басталады. Елімізде тұмауға қарсы екпенің 3 түрі егіледі. Олар: «Ваксигрипп» (Франция), «Инфлювак» (Нидерланды) және «Гриппол-плюс» (Ресей Федерациясы). Аудан тұрғындарының 10 пайызын екпемен қамту жоспарланған. 
ҚР ҰЭМ 2015 жылғы 12 ақпандағы №194 бұйрығының 303-бабы 5-тармағына сәйкес эпидемия алдындағы кезеңде медицина қызметкерлерін, медицина ұйымдарында диспансерлік есепте тұрған балаларды, әлсіз және алты айдан асқан көп ауыратын балаларды, мүгедектерді, жүктіліктің екінші немесе үшінші триместрінде және эпидемиологиялық көрсетімдері бойынша жүкті әйелдерді жыл сайын тұмауға қарсы вакцинациялауды жүргізу қамтамасыз етіледі. Осыған орай ауданда осы жылы жоспар бойынша 8350 азаматқа екпе егіледі. Соның ішінде жүкті әйел – 650, 6-3 жас аралығындағы балалар – 1600, 3-14 жас аралығындағы жиі ауыратын балалар – 4900, 15-17 жастағы жасөспірімдер – 500, медицина қызметкерлері – 674, оңалту орталығындағы мүгедек балалар – 26.  Осы көрсетілген топтарға тұмауға қарсы екпе тегін егіледі. Сонымен қатар қамтылуға тиісті топтардан тыс азаматтар ақылы түрде тұрғылықты мекенжайы бойынша емханада екпе салдыруына болады.
Тұмаудың асқынулары өте ауыр түрде өтетіндіктен, алдын алу шараларының ең тиімдісі екпе егу болып саналады. 

Ж. ТОТАЕВА,
аудандық орталық аурухананың иммунолог-дәрігері.

Бөлім:  Денсаулық

Жуырда Б.Момышұлы, Төле би, Жеңістің 30 жылдығы және Ю.Гагарин атындағы орта мектеп оқушыларынан жасақталған ұлдар құрамасы облыстық деңгейде өткен турнирде жүлдегерлер қатарынан табылып, аудан атын асқақтатты.
10 команда қатысқан ойында жерлестеріміз алдымен Тараз қаласындағы №46 орта мектептің командасын 3:1 есебімен ұтса, жеңісті жорығын жалғастырған олар №36 және Жуалы ауданының командаларын 1:0, 2:0 есебімен қапы қалдырды. №15 мектеп командасымен тең түсіп, осы командамен жартылай финалда қайта кездескен жерлестеріміз 0:1 есебімен есе жіберіп алды. Нәтижесінде, аудан жастары үшінші орынды қанағат тұтты.
Ойын барысында шеберлік та­ныт­қан шабуылшы Санжар Кемелбек «Үздік ойыншы» атанды. Үздік­тер қатарынан қақпашы Заңғар Тұрған да көрініп, мерейімізді үстем етті.
Команда жаттықтырушысы Шоқан Дүйсенбиевтің айтуынша, жастарымыздың әлі-ақ биік белестерді бағындыруға мүмкіндіктері бар екен. Лайым, солай болғай дестік біз.

Іңкәр СҮЛЕЙМЕН.

Бөлім:  Спорт
Сенбі, 30 Қыркүйек 2017 00:00

Мерейі үстем қашанда

Ықылым заманнан бері ұстаздықтың шоқтығы биік болған. Тамшысымен тас тесетін бейнебір су тәрізді жандарға ілтипат таныту – адамгершіліктің бір белгісі. Ақыл-парасаты мол тұлғалардың көпшілігі ұстазына ерекше құрметпен қарап, әрдайым ізетпен еске алғаны мәлім.
Осындай мамандығына деген сүйіспеншілігінің нәтижесінде көпке үлгі болып жүрген аяулы жандардың бірі – Қ.Сартбаев атындағы орта мектептің қазақ тілі мен әдебиеті пәнінің мұғалімі Мәрзия Ержанова. Оның оқушыларына берген тәлім-тәрбиесі, махаббаты, жүрегінің тазалығы, көңілінің ақтығы шәкірттерді жоғары жетістіктерге жетелейді.
Тәуелсіз ел атанып, төбемізге ту тігіп, тіліміздің мәртебесі артып, әлемге атымызды танытып жатқан кезеңде ұлттың, елдің болашағы – жас ұрпақ тәрбиесіне аса көңіл аударып жүрген Мәрзия Сейіткерімқызының еңбегі зор деп білемін. Ол кісінің аудандық, облыстық, республикалық басылым беттерінде үздік ашық сабақтары, өзекті мәселелерді қозғаған «Жаңаша оқыту – заман талабы» мақаласы жарияланды.
Сонымен қатар ол шәкірттерін білім нәрімен сусындатып, жоғары белестерден көрінуін ұстаздық парызым деп санайды. Әрине, «Ұстазы жақсының – ұстамы жақсы» дейді. Мұғалімнің тікелей жетелеуімен жүлделі орындарды бағындырған оқушыларының саны да бір төбе. Айта кетелік, Нұргүл Бектай, Әлішер Оңлабай, Қымбат Ерғалиқызы, Жәния Сағынбекқызы, Аруай Таңатар сынды шәкірттері ұстаз еңбегінің арқасында талай сынақтардан сүрінбей өтіп, дүбірлі сайыстардан жүлдемен оралды. Жаһандану заманында ұлттың бәсекеге қабілетті болуының көрсеткіші білім деңгейімен өлшенетіні анық. Елбасы Нұрсұлтан Назарбаев: «Болашақта еңбек етіп, өмір сүретіндер – бүгінгі мектеп оқушылары, мұғалім оларды қалай тәрбиелесе, Қазақстан сол деңгейде болады. Сондықтан ұстазға жүктелетін міндет ауыр», – деген еді. Осы тұрғыда қашанда тынымсыз ізденіс жолында жүретін ұстаз еңбегінің жемісі мәуелі бола берсін деп тілеймін.

Күлипа ТҮЙІНШЕКОВА,
мектеп директорының ғылыми әдістемелік ісі жөніндегі орынбасары.

Бөлім:  Білім
Сенбі, 30 Қыркүйек 2017 00:00

Болашақ бүгіннен басталады

Мектептің жаны – мұғалім. Мұғалім қандай болса, мектеп сондай болмақшы. Яғни, мұғалім білімді болса, ол мектептен балалар көбірек білім алып шықпақшы. Солай болған соң, ең әуелі мектепке керегі – білімді, педагогикадан, методикадан хабардар, жақсы оқыта білетін мұғалім.
Ахмет Байтұрсынұлы.
Аудан орталығында орналасқан білім ошақтарының бірі – Аса дайындық білім беру орталығы. Санаулы жылдардың өзінде білім мен тәрбие ошағына айналып үлгерген орталықта бүгінде 40 шәкірт тәрбиеленуде. Білім мен тәрбиеге негізделген мекемеде бала үшін барлық жағдай жасалғанын естіп-білген ата-аналар сонау шалғайдан арнайы келіп, балаларының осы орталықта оқығандарын жөн көреді екен. Оған қоса, былтырғы жылы осы орталықтан түлеп ұшқан жеті түлектің бәрінің де оқу гранттарына ие болуы орталықтағы жұмыстың нәтижесін көрсетіп тұр.
Жуырда ғана мектеп директоры қызметін атқара бастаған Әскербек Нарқұлұлы Құрманбаев биылғы оқу жылының жаңалықтары мен алдағы жоспарлар туралы ой бөліскен еді.
– Ел арасында «бір жылыңды ойласаң – егін ек, он жылыңды ойласаң – тал ек, жүз жылыңды ойласаң – ұрпақ тәрбиеле» деген жақсы сөз бар. Мен ұстаздық жолымды Шымкент қаласында орналасқан Сабыр Рахымов атындағы «Жасұлан» әскери мектебінде бастадым. Мамандығым – география пәнінің мұғалімі.  Осы уақытқа дейінгі педагогикалық тәжірибемді таразылай келе, ұстаздық ең қадірлі мамандық екенін ұғындым. Себебі, ұстаз бала санасын тәрбиелейді. Ал сана-сезім тәрбиесі ұрпақтан ұрпаққа берілетіні анық. Осыдан-ақ, ұстаздық қандай жауапты мамандық екенін біле беруге болады.
Біз үшін орталықта тәрбиеленіп, білім нәрін бойына сіңіріп жүрген әрбір бала – ол болашақ мамандық иесі, ел азаматы, тұлға. Сондықтан, баланың қарым-қабілетінің дамуына, шығармашылық ізденістерінің айқындалуына барлық жағдай жасау мақсатында қазақ тілі, орыс тілі, математикалық сауаттылық, шет тілі, тарих, география, физика сабақтары тереңдетіліп оқытылады. Мұнда 8-11 сынып аралығындағы оқушылар Б.Момышұлы атындағы орта мектепте оқиды және орталықта сағат 15.30-18.30 аралығында қосымша сабақтарға дайындалады. Одан кейін бір сағат көлемінде оқу залында шәкірттер көркем шығармаларды оқып, тәрбиелік мәні мен мазмұнына талдау жасау арқылы тіл байлығын дамытып, ойын дәл жеткізе білуге дағдыланады. Балалардың бос уақытын тиімді пайдалану мақсатында кіші футбол алаңы салынған, теннис үстелі қойылған, асхана, пәндік оқу кабинеттері, кітапхана, жатын бөлмелер, жуыну бөлмелері мен киімдерін жууға арналған бөлмелер бар. Мұнда балалар төрт мезгіл тамақпен қамтамасыз етіліп, үнемі тәрбиешілерінің қадағалауында болады. Жоғары санаттағы 7 мұғалім сабақ береді.
Жуырда ғана оқушыларды Айша бибі, Қарахан кесенелерінің тарихымен таныстырып, «Көне Тараз» мәдени-тынығу демалыс орнына саяхатқа апарып келдік. Себебі, мұнда шалғай облыстан келген оқушылар көп. Орталықта барлық маңызды даталарға арналған іс-шаралар, байқаулар ұйымдастырылып тұрады. Қайырымдылық акцияларына балаларды қатыстыру арқылы рухани тәрбие негіздерін: ата-ананы қадірлеу, үлкенге құрмет, кішіге ізет білдіру деген сияқты ұлттық тәрбиеміздің құндылықтарын жандандыру мақсатында еңбектенудеміз. Себебі, адамзат өркениетінің даму тарихында тек жақсы мектебі мен мұғалімдері бар мемлекет қана озып шыққан деген пікір бүгінгі күннің айғағына айналып отыр, – деді Аса дайындық білім беру орталығының директоры Ә.Құрманбаев.
Сонымен қатар, директордың оқу ісі жөніндегі орынбасары, қазақ тілі және әдебиетінің мұғалімі Гүлжан Үсіпбекова орталықта тәрбиеленуші жастардың көбі аудандық, облыстық, республикалық олимпиадалардың, байқаулардың жеңімпаздары екенін айтып:
– Орталықта Оңтүстік Қазақстан, Қызылорда облысынан және Тараз қаласынан келген балалар бар. Ауыл-аймақтағы жұрттың біреуі білсе, біреуі білмес. Бұл жердегі тәрбие мен білімнің көрсеткіші қалалардағы оқу орталықтарымен бірдей. Бұған дәлел, былтырғы оқу жылында да, арғы жылы да бітірген түлектер оқу гранттарын иеленді.
Биылғы оқу жылында білім алып жүрген оқушылардың ішінен «Ақберен» облыстық байқауының 2-орын иегері Н.Қанай, КИО интернет олимпиадаларының жеңімпаздары Э.Дүйсенбаев, М.Сәткен, Е.Мұсаев, М.Құрбанқожа, А.Құрбанқожа, «Махамбет оқулары» және «Мағжан оқулары» байқауларының бас жүлдегері А.Сұлтанбаев, «Жігіт сұлтаны» байқауының жеңімпазы Б.Шырбановты ерекше атап өткім келеді. Жылдағы дәстүрмен оқу-тәрбие жұмыстары жүйелі түрде іске асырылмақ. Осы бағытта пән мұғалімдері де, балалар да ынтымақтаса еңбектенетініне сенімдімін, – деп ойын қорытындылады.
Болашақтың белгісін бүгіннен көруге болады. Бүгінгі күн – ол адам баласының ертеңі. Сондықтан да, ғылым мен техника көз ілеспес жылдамдықпен қарыштап дамыған заманға бейім жастарды тәрбиелеу, оларға қажетті бағыт-бағдар беру білікті ұстаз бен заманауи білім ордасының еншісінде екені анық.

Күнзипа Ситалиева,
«Шұғыла».

Бөлім:  Білім
Сенбі, 30 Қыркүйек 2017 00:00

Ардагерлер – дастархан басында

Ақсақалдар сарқылмас дариялар,
Әр сөзінен көңілге бақ ұялар.
Сіздерді құрметтейміз, қадірлейміз,
Аяулы ардагерлер, қариялар, – деген өлең жолдарымен өрнектеліп, қазыналы қарттарымызды ардақтауға арналған мерекелік шара Аса ауылдық округі әкімшілігі, «Нұр Отан» партиясының аудандық филиалы, «Жастар ресурстық орталығы», аудандық орталықтандырылған кітапханалар жүйесі мекемесі бірлесіп ұйымдастыруымен Аса ауылындағы «Береке» дәмханасында өтті. Дастархан басында аудандық ардагерлер кеңесінің төрағасы Бақыт Сырлыбаев бастаған бір топ ақсақалдар С.Ережепбаев, Ж.Сәлемов, С.Күзербаев, Р.Жапаров, А.Балқыбеков, Б.Асқаров, А.Сапарбеков, Б.Төлентаев, М.Қасымбеков, А.Сыдықов, Т.Туғанбаев бас қосып, өнегелі әңгімелерін айтып, өткен күннің естеліктерімен бөлісті. 
Аса ауылдық округінің әкімі Бауыржан Қалшымбетов, аудандық орталықтандырылған кітапханалар жүйесінің директоры Аида Қалисаева, «Нұр Отан» партиясы аудандық филиалының консультанты Бақытжан Кикбаев, «Жастар ресурстық орталығының» директоры Жасұлан Үсенбаев ардагерлерге жылы лебіздерін арнап, мерекемен құттықтады. Кешті жүргізуші Құралай Асхатаева қарттарға сөз кезегін ұсынса, кітапханашылар А.Құрымбаева, А.Исаева танымал ақындардың өлеңдерін оқыды. Мереке барысында аудандық Мәдениет үйінің әншісі Айнұр Төлебекова ән салып, зейнеткер Ақан Сыдықов домбырамен күй тартты, жергілікті ақын Б.Төлентаев мерекелік арнау өлеңдерін оқыды. Ақсақалдар кешті ұйымдастырушыларға алғыстарын айтып, ақ батасын берді.
Күнзипа Ситалиева,
«Шұғыла».

Бөлім:  Қоғам

Бейсенбі күні аудан әкімдігінің мәжіліс залында аудан әкімдігі жанындағы кәмелетке толмағандардың істері және олардың құқықтарын қорғау жөніндегі комиссияның аудандық прокуратурамен бірлескен отырысы өтті.
Аудан прокуроры Нұрлан Қарашолақ, комиссия мүшелері, ауылдық округ әкімдері мен мектеп директорлары және мектептердегі кәмелетке толмағандардың ісі жөніндегі полиция инспекторлары мен мобильдік топ мүшелері қатысқан комиссия отырысын аудан әкімінің орынбасары Үміткен Найманова ашып, жүргізді.
Кеңейтілген отырыста аудан әкімдігі білім бөлімінің басшысы Раушан Қожамжарова аудан әкімдігінің білім бөлімі жанындағы қорғаншылық және қамқоршылық кеңесінде атқарылып жатқан жұмыстар жайында кеңінен баяндады.
Баяндамашының сөзіне сүйенсек, 2016 жылдың қорытындысы бойынша жетім және ата-анасының қамқорлығынсыз қалған 82 бала қорғаншылық, қамқоршылықта тіркелген. Ал, 2017 жылдың бүгінгі күніне 98 бала қорғаншылық және қамқоршылыққа алынған. Оларға ай сайын мемлекет тарапынан белгілі бір мөлшерде жәрдемақы төленуде. Сондай-ақ патронаттық тәрбиедегі 33 баланың 7 жасқа дейінгілеріне 9 АЕК (20421 теңге), 7 жастан жоғарыларға 10 АЕК (22690 теңге) жәрдемақы және патронаттық тәрбиешілерге еңбек өтіліне қарай айлық ақылары төленетіні баяндалды. Бұдан бөлек, «Жамбыл облысында 2016-2017 жылдарға арналған кәмелетке толмағандар арасындағы құқық бұзушылықтардың, оның ішінде оларға қарсы жыныстық сипаттағы қылмыстың және өзіне-өзі қол жұмсаудың алдын алу профилактикасы жөніндегі кешенді жоспардың» орындалуы мақсатында жүргізілген жұмыстар жайында тарқата айтып, егжей-тегжейлі түсіндірді.
Күн тәртібіндегі бірінші мәселе бойынша қосымша хабарлама жасаған АІІБ Жергілікті полиция қызметінің бастығы Дархан Нұралиев былтырғы жылмен салыстырғанда кәмелетке толмағандардың жыныстық тиіспеушілігіне қарсы қылмыстық құқық бұзушылықтың алдын алу бойынша біршама жұмыстар атқарылғанын, сонымен қатар осыған байланысты ауданымыздағы барлық ауылдық округ әкімі аппараттарымен, білім бөлімінің қызметкерлерімен, мектеп директорларымен, олардың құқықтық тәрбие ісі жөніндегі орынбасарларымен, әлеуметтік педагогтармен және психологтармен бірлесе отырып, жайсыз отбасы санаты есебінде тұратын азаматтар мен онда тәрбиеленетін жасөспірімдер арасында қылмыстың, құқық бұзушылықтың, жыныстық қол сұғушылықтың, суицидтің алдын алу мақсатында үнемі профилактикалық жұмыстар жүргізіліп отырғанын мәлімдеді.
Комиссия отырысында сонымен қатар аудан көлемінде анықталған жайсыз отбасылар және жайсыз отбасы балаларына көрсетіліп жатқан көмек, оларды түрлі іс-шараларға тарту бойынша атқарып жатқан жұмыстар туралы аудан әкімдігі жұмыспен қамту және әлеуметтік бағдарламалар бөлімінің басшысы Еркін Келесов, дене шынықтыру және спорт бөлімінің басшысы Қайрат Ержігітов және «Жастар ресурстық орталығының» директоры Жасұлан Үсенбаевтың есептері тыңдалды.
Комиссия отырысын қорытындылаған Үміткен Қапанқызы кәмелетке толмағандар арасындағы құқық бұзушылықтың, суицидтің, жыныстық қол сұғушылықтың алдын алу бойынша профилактикалық жұмыстарды жандандыруды, аудандық аурухана психологтарын қатыстыра отырып мектептерде ата-аналар жиналысын өткізуді және жасөспірімдер арасындағы құқық бұзушылықтың алдын алу, жайсыз отбасыларды анықтау мақсатында рейдтік іс-шараларды көптеп ұйымдастыруды, сондай-ақ прокуратура қызметкерлерін, ауыл әкімдерін, ауылдық округ жанындағы әйелдер, ардагерлер кеңесін қатыстырып, жайсыз отбасы балаларының жағдайын анықтай отырып жиналыстар өткізуді қолға алу керектігін айтты.
Жиында талқыланған маңызды мәселелер бойынша тиісті қаулылар қабылданды.
Мақсат Жұмабаев,
«Шұғыла».

Бөлім:  Құқық
Сенбі, 30 Қыркүйек 2017 00:00

Қарттар – біздің асыл қазынамыз

1 қазан – Халықаралық қарттар күні. Бұл мереке аға ұрпақтың қоғам өміріне қосқан үлесіне шынайы ризашылық білдіретін және ардагерлерге қамқорлық пен құрмет көрсететін күн. Үлкендерге деген құрмет пен оларға ұдайы қамқорлық мемлекетіміздің, Елбасымыздың әлеуметтік саясатының басым бағыты болып табылады.

«Қарты бар үйдің қазынасы бар» дейді халық даналығы. Сол айтқандай, үйінде қариясы бар жанұя – қазыналы, берекелі отбасы. Сондықтан да, қарияларға қамқор болу – жалпы қоғамның және әрбіріміздің міндетіміз. Өйткені жасы ұлғайған адамдар – мемлекетіміздің алтын қоры, ұлтымыздың, салт-дәстүріміздің, дініміз бен діліміздің сақтаушысы, жастарды отансүйгіштікке баулитын, ата-бабаның өнегелі жолын ұмыттырмайтын жалғастырушы. 
Қария болу деген сөз – елдің басы болу, ақылын айтар дана болу, ел төрінде құрметке бөлену. Ол – шаңырақтың шаттығын сақтаушы, бірлігін бекем етуші, ақылы мен нақылын айтар кемел ойдың иесі. Қария – үйдің берекесі мен мерекесі. Олардың әрбір айтқан гауһар тасқа бергісіз ақылы жас ұрпақтың өсіп-өркендеуіне өлшеусіз үлес қоса бермек.
Дана халқымыз «Төріңнен қарт кетпесін» деп тілеген. Жасы үлкенге құрмет ету, қарттың бүгілген беліне сүйеу болу – біздің ата дәстүріміз. Осы дәстүрді ұмытпайық. Бүгінгі жас – ертеңгі қария. Болашағымызды ойлайық.
«Бабаларым, рахмет сендерге!
Балаларым болмасын деп бос кеуде,
Қобызыңмен қосып ән мен тіл бердің,
Өмірге мен мылқау болып енгенде,
Бабаларым, рахмет сендерге!» – деп Мұқағали Мақатаев айтқандай, біз ата-әжелеріміздің алдында қарыздармыз. Ол қарызымызды тек жақсы тәрбие арқылы, адамгершілігі мол, мейірімді болу арқылы ғана, оларды көрген жерде құрметтеп сыйлау арқылы ғана қайтара аламыз.
Қарттарымызды ардақтайық, сыйлайық, қадірлейік.
Бақыт Сырлыбаев,
аудандық ардагерлер кеңесінің төрағасы.

Бөлім:  Қоғам
Сенбі, 30 Қыркүйек 2017 00:00

Шайқорықта — жаңа спорт кешені

Спорт – қоғамдағы жалпы мәдениеттің бір бөлігі, адамның дене қабілеттерін дамыту мен денсаулығын нығайтуға бағытталған әлеуметтік қызметтің бір саласы. Мемлекеттің мәртебесін, ұлттың намысын айқындайтын көрсеткіш. Жастардың жан-жақты дамуын спортсыз елестету мүмкін емес.
Кеше Шайқорық ауылында Кеңес Одағының спорт шебері Бақытжан Ташметов атындағы спорт кешені салтанатты жағдайда ашылды. Спорт кешенінің ашылуы рәсіміне аудан әкімі Бақыт Қазанбасов, облыс әкімдігі дене шынықтыру және спорт басқармасының басшысы Нұрбол Жүнісбеков, Ұлттық олимпиада комитетінің спорттық директоры Арман Ташметов, Дүниежүзілік қазақ күресі федерациясының вице-президенті Талғат Мәзімбаев, ҚР «Стрит Воркаут» федерациясының президенті Дамир Муминов, дзюдодан Бейжін олимпиадасының күміс жүлдегері Асхат Жіткеев, ауыл тұрғындары арнайы келді.
Салтанатты шарада алғашқы болып сөз алған Бақыт Алпысбайұлы: «Ауданымызда бұқаралық спортты дамыту жүйелі жолға қойылған. Қазіргі уақытта ауданда 150 спорт нысаны бар. Спортпен жүйелі түрде жергілікті тұрғындардың 27,9 пайызы, яғни, 22329 адам шұғылдануда. Өңірлерді дамыту бағдарламасы бойынша өткен жылы 2 спорт нысаны, ағымдағы жылы 2 спорт нысаны пайдалануға берілді. Спорт нысандарында жаттығып жүрген балуандарымыз облыстық, республикалық, әлемдік деңгейдегі жарыстарда жеңіс тұғырынан көрінуде. Ауылдасымыз Мадияр Отыншиевтің демеушілігімен ауыл жастары үшін 100 адамға арналған спорт кешені пайдалануға берілгелі тұр. Бұл ауданымызда бәсекеге қабілетті, прагматикалық, мықты, отансүйгіш және белсенді тұлғалардың қалыптасуына зор мүмкіншілік беретіні сөзсіз. Мадияр сынды патриот, жанашыр азаматтарымыз көп болсын дегім келеді», – деді.
Жылы лебіздер легін жалғаған облыс әкімдігі дене шынықтыру және спорт басқармасының басшысы Нұрбол Жүнісбеков, Жамбыл ауылдық ардагерлер кеңесінің төрағасы Орынбай Рысбаев шайқорықтықтарды бұқаралық спортты қолдауға, әрдайым спортпен айналысуға шақырды.
Ізгі тілектерден кейін аудан әкімі Бақыт Қазанбасов, облыс әкімдігі дене шынықтыру және спорт басқармасының басшысы Нұрбол Жүнісбеков, дзюдодан Бейжін олимпиадасының күміс жүлдегері Асхат Жіткеев жаңа спорт кешенінің кермесін қиып, кешеннің ішін жиналған көпшілікпен бірге аралап көріп, естелікке суретке түсті.
Ильяс Қалыбеков,

«Шұғыла».

Бөлім:  Спорт
Сәрсебі, 27 Қыркүйек 2017 00:00

Мамандар сайысы

Жақында Жамбыл аудандық балалар мен жасөспірімдер кітапханасы және Жамбыл облысы әкімдігінің жұмыспен қамтуды үйлестіру және әлеуметтік бағдарламалар басқармасының Жамбыл облыстық мүгедек  балаларды оңалту және бейімдеу орталығы КММ филиалы тілдер мерекесіне орай «Тіл – елімнің тірегі» атты мамандар сайысын ұйымдастырды.
Сайыста «Таныстыру», «Бәйге» (сұрақ-жауап), «Өлең – сөздің патшасы» (мәнерлеп өлең оқу), «Мақал – сөздің мәйегі» (мақалдың жалғасын табу), «Сөз тапқанға қолқа жоқ» (тұрақты тіркестің мағынасын табу), «Сегіз қырлы, бір сырлы» (сайыскердің өнері) кезеңдері бойынша сынға түскен қызметкерлерге облыстық мүгедек балаларды оңалту және бейімдеу орталығы КММ филиалының директоры Жанна Баубекова, «Сенім» жастар денсаулық сақтау орталығының дәрігері Аида Тоқсанбаева, аудандық балалар мен жасөспірімдер кітапханасының меңгерушісі Шолпан Көпжасарова төрелік етті. Нәтижесінде, педагог-психолог Айнұр Абралиева бірінші орынды, дефектолог Назгүл Садырәлі екінші орынды, тәрбиеші Жадыра Алиева үшінші орынды иеленіп, қалған бес қызметкер номинациялар бойынша жүлдеге ие болды.
Кеш соңында сайыс жүргізушісі, кітапханашы Замира Хожамкулова «Қазақ тілі – мәртебесі елімнің» атты кітап көрмесіне библиографиялық шолу жасады.
Күнзипа Ситалиева,
«Шұғыла».

Бөлім:  Тіл
Сәрсебі, 27 Қыркүйек 2017 00:00

Сахнада – өзге ұлт өкілдері

Тілім менің – ғасырлардан аманат!
Аманатқа адал болсақ қанағат,
Ар-намысқа келтірмейік жаманат.
Адам болып туылдың ба, ендеше,
Өз тіліңді өзгелерге бағалат, – деп басталған «Тіл – татулық тірегі» атты өзге ұлт өкілдері арасындағы тіл фестивалі аудандық Мәдениет үйінде өтті. «Юлдызлар» (татар ұлтының өкілдері, Бесағаш ауылдық округі), «Ювель» (неміс ұлтының өкілдері, Гродиково ауылдық округі), «Күлейлік» (күрді ұлтының өкілдері, Қызылқайнар ауылдық округі), Константин Чижиков бастаған топ (орыс ұлтының өкілдері, Өрнек ауылдық округі), «Вынхуа» (дүнген ұлтының өкілдері, Полатқосшы ауылдық округі) топтары қатысқан аудандық тіл фестивалі «Таныстыру» (мемлекеттік тілде), «Әр елдің салты басқа» (өз ұлтының ұлттық салт-дәстүрі), «Шығармашылық өнер» (музыкалық аспапта ойнау, ән салу, би билеу, т.б.) кезеңдері бойынша тіл байлығын, тарихы мен мәдениетін көрермен назарына ұсынды.
Байқауда төрелік еткен қазылар алқасының төрайымы – аудан әкімдігі мәдениет және тілдерді дамыту бөлімінің бас маманы Гүлхан Әлімбекова, қазылар алқасының мүшелері – аудандық тарихи-өлкетану мұражайының меңгерушісі Гүлбағира Бекжанова, аудандық Мәдениет үйінің әдістемелік бөлме меңгерушісі Нүрилә Исаева қатысушылардың өнерін, қарым-қабілет, ынтасын таразылай келе ынталандыру номинациясын күрді ұлтының өкілдерінен құралған «Күлейлік» тобына, 3-ші орынды неміс ұлтының өкілдері бар «Ювель» тобына, 2-ші орынды орыс ұлтының өкілі К.Чижиков бастаған топқа, 1-ші орынды татар ұлтының өкілдерінен құралған «Юлдызлар» тобына, бас жүлдені дүнген ұлтының өкілдерінен құралған «Вынхуа» тобына табыс етіп, бағалы сыйлықтармен марапаттады.

Күнзипа Ситалиева,
«Шұғыла».

Бөлім:  Тіл
Бет 1 -ші 7 беттен

Серіктестер