Материалы отфильтрованы по дате: Қазан 2017
Сәрсебі, 18 Қазан 2017 00:00

Аманатқа жаман ат келтірмейік

Әрбір ер азамат ат жалын тартып, кәмелеттік жасқа толғаннан кейін өз атасының ғана емес, Отанының да ұлы екенін ұмытпағаны жөн шығар. Азамат ұмытпауға тиіс ең маңызды мәселе – Отан алдындағы әскери борышын өтеу. Өйткені жастарға бүкіл ел үлкен сенім артады. Шекарамыз мығым, әскеріміз мықты деп түн ұйқысын төрт бөлмей тыныш ұйықтайды олар.
Сенімді серік еткен Полатқосшы ауылдық округі әкімі аппаратының бас маман-есеп жүргізушісі Сәкен Мырзабай жоспарланған іс-шара бойынша 2001-2002 жылдары туылған азаматтарды аудандық қорғаныс істері жөніндегі бөліміне диспансеризациялық байқаудан өтуге жататын жасөспірімдерді жеткізу жұмыстарын жүргізуі осындағы әкімшілік қызметкерлерін де, ауыл ардагерлерін де, дәрігерлерді де, мектеп мұғалімдерін де бей-жай қалдырмаған. Сол күні 89 жасөспірім тізімге алынды.
Сап түзеген болашақ сарбаздар­дың алдында Полатқосшы ауылдық округі әкімінің орынбасары Айнұр Досманбетова, ішкі істер саласының ардагері Сәпілмәлік Тажиев, ауыл ақсақалы, «Айрықша тәуекелді солдаттар» қоғамдық бірлестігінің мүшесі Әлімжан Данаев, Жалпақтөбе ауылдық емханасының медбикесі Магзура Шамшиева, Чкалов атын­дағы орта мектептің алғашқы әскери дайындық пәні мұға­лімі Осман Каримов, ауыл әкі­мі аппаратының бас маман-әске­ри есеп жүргізушілері Сәкен Мырзабай мен Нұржан Әміров жас­тар арасындағы патриоттық сезімді арттыруға, Отанға деген сүйіспеншілікті дамытуға әскери қызметтің тигізер пайдасы зор екенін, ер болып туылғаннан кейін туған жерін, өз мемлекетін қорғау әр азаматтың борышы саналатынын айтып, оларды әскери міндеттерін адал атқарады деген сенімді аманат етті.
Осындайда жастарымыздың бүгінгі өткен кездесуде «жастарымыз Отан алдындағы әскери парызын адал атқарады» деген үлкендердің аманатына жаман ат келтірмейтініне сенгіміз келеді.

Дүйсенбек ОРМАНОВ,
«Шұғыла».

Бөлім:  Жастар
Сәрсебі, 18 Қазан 2017 00:00

Қызылдиқанда қызу еңбек

Қыс бойына мүлгіген дала көктем шыға қайта оянып, шеті мен шегі жоқтай көрінетін кербез далаға жан бітіп, диқандар кетпен, тырмасын арқалай сонда беттейді. Осы көрініс жер-ана ақ көрпесін жамылғанша еш толастамайды. Бүгін де солай. Диқандар үшін бұл мезгіл еңбектің жемісін көретін уақыт. Яғни, дала еңбеккерлері қант қызылшасын толассыз қант зауытына тасымалдауда. Бүгінгі күнге дейін аудан бойынша зауытқа 2,5 мың тонна тәтті түбір жеткізілген.
Аудан әкімі Бақыт Қазанбасов, аудандық мәслихаттың хатшысы Рүстем Бегалиев, аудан әкімінің орынбасары Ерлан Қыдыралыұлы, «Нұр Отан» партиясы аудандық филиалы төрағасының бірінші орынбасары Нұрлан Несіпбеков және аудан әкімдігі ауыл шаруашылығы бөлімінің басшысы Аманалы Құрбановпен «Қызылдиқан» өндірістік кооперативінің бүгінгі тынысын көруге барғанымызда қызу еңбектің куәсі болғанбыз.
Елу-елу гектардан екі жерге бөлініп егілген 100 гектар қызылша алқаптарының бүгінгі жай-күйі көңіл көншітеді. Жапырағын жайып жайқалған қызылша алыстан көз тартады.
Қазық жұмысын бастағандарына 6-7 күн болған. Тасымалдауда кідіріс жоқ. Көмекке келгендердің көңілі көтеріңкі. Кілең жастар екен. Соған қарап-ақ мұнда тиянақты тірлік тындырылып жатқанын байқадық.
– Жігіттер, осылайша көптеп көмектессеңдер, аспайтын асуымыз қалмайтын шығар. Біз жастарға, яғни өздеріңдей қыз-жігіттерге сенеміз, – деді аудан басшысы үймек қасында қызылшаны жапырағынан арылтып отырған жастарға қарап. Кезегінде жастар да сенім үдесінен шығатынын жеткізді.
Аудандық мәслихаттың депутаты, «Қызылдиқан» өндірістік кооперативінің төрағасы Нуритдин Бегмановтың айтуынша, өз қаражаттары есебінен жақында ғана әкелінген украиналық РКМ-6-01 агрегатымен жұмыс жасауда екен. Қалай дегенде де өзі қопсытып, өзі көлікке артып беретін бұл техника адамдар еңбегін едәуір жеңілдетіп отырған көрінеді.
Қызылдиқандағы қарбалас толастамақ емес. Оған қызылшашы­лардың «бір жеңнен қол, бір жағадан бас» шығара білген ұйымшылдығы куә.
Дүйсенбек ОРМАНОВ,
«Шұғыла».

Сәрсебі, 18 Қазан 2017 00:00

Ет, сүт, көкөніс керек пе? Алыңыз!

Өткен сенбі жамбылдықтар үшін қолайлы күн болды. Күн де нұрын төгіп, төңірек құлпыра түскен. Адамдар да көңілді. Өйткені, тап осы күні аудан орталығындағы алаңда ауыл шаруашылығы жәрмеңкесі өтіп, тұрғындар керектерін тауып жатты.
Ет, сүт, көкөніс керек пе? Алыңыз! Тіпті, мұнда ас атасы – нан да, пияз, сәбіз, қызанақ, қияр да, асқабақ пен асханалық қызылша да, ысталған және бұқтырылған шұжық та, жұмыртқа, бидай мен арпа да болды. Яғни, не керектің бәрі бар. Халық керегінше сатып алып жатты. Әрине, қолжетімді бағаға.
Аудан әкімдігі ауыл шаруашылығы бөлімінің сектор меңгерушісі Зағипа Әуелбаеваның айтуынша, осы күні жәрмеңкеде 3,2 миллион теңгенің өнімдері саудаланған.
Нарық шарықтап тұрған шақта аудан әкімдігі тарапынан ұйымдастырылған бұл жәрмеңкеге барлық ауылдық округтердің диқандары өз өнімдерін халықтың алдына жайғанын игілікті іске балағанымыз жөн болар.
Сол күні жәрмеңкенің өту барысын бақылаған аудан әкімі Бақыт Қазанбасов оң бағасын беріп, алдағы сенбіде аудан диқандары өнімдерін Тараз қаласының «Достық» алаңында өтетін көрме-жәрмеңкеге алып баратынын айтты.
Дүйсенбек ОРМАНОВ,
«Шұғыла».

Сәрсебі, 18 Қазан 2017 00:00

Ардагерлер алдан көрінді

Аудандық ішкі істер бөлімінің бастығы, полиция полковнигі Талғатбек Татеновтің осы орынтаққа отырған күнінен құрамдағы барлық қызметкер­лер спортқа аса ден қоя бастағандай. Осы салада ұзақ қызмет етіп, бүгінде зейнетте жүрген ардагерлер де әркез ойын алаңынан табылуда.
Жуырда аудан орталығындағы кіші футбол алаңында криминалдық полиция күніне орай футболдан жарыс ұйымдастырылып, оған ардагерлер, қылмыстық іздестіру, ювеналдық полиция, әкімшілік, Жалпақтөбе полиция, күзетпен айдау бөлімшелері және учаскелік инспекторлар құрамасы қатысып, ойын көрігін қыздырды.
Қас қарайғанша жалғасқан жарыс қорытындысында финалдық ойында жалпақтөбелік қарсыластарын қапы қалдырған «Ардагерлер» командасы жеңімпаз атанып, үлкен кубокты иеленді. Екінші орын жалпақтөбелік (капитаны Асылбек Сүйеубаев) командаға бұйырды. Үшінші орынды «Әкімшілік» командасы (капитаны Дархан Нұралиев) иеленді.
Ардагерлердің алды 60 жасты алқымдаса, ең кішісі 50 жасты еңсер­гендер еді. Жастарының ұлғайғанына қарамастан жастарды жолда қалдырған ардагерлерге көрермендер риза болды. Ойын барысында шеберлік танытқан ойыншылар ретінде осы ардагерлердің есімдері аталды. Мәселен, «Үздік қақпашы» ретінде «Ардагерлер» командасының капитаны Нұрсейіт Әлімқұлов танылса, «Үздік шабуылшы» атағын Дәурен Ізтілеуов иеленді. Ойында ең көп гол соққан Алмаз Лепесовтың есімі де құрметпен аталды.
Марапаттау сәтінде сөз алған бұрынғы АІІБ-нің бастығы, запастағы полиция полковнигі Сәкен Әшімәлиев спорттық іс-шараларды жиі ұйымдастырып отырған әріптесі Талғатбек Болатбекұлына ыстық ықыласын жеткізді. Ол «Ардагерлер» құрамасына ойындағы өрнегі үшін және команда капитаны Нұрсейіт Әлімқұловтың кезінде өзіне тәлімгер болғанын еске алып, рахмет айтты.
Кезегінде бөлім бастығы Талғатбек Татенов жеңімпаздар мен жүл­дегерлерді және үздік ойыншыларды салтанатты жағдайда марапаттады.

Ақнұр ПІРІМҚҰЛОВА,
АІІБ ақпараттық-аналитикалық тобының аға инспекторы, полиция капитаны.

Бөлім:  Спорт

Отандық фермерлер мен елді мекендерді қолдау мақсатында AgroBiz.kz атты көпфункционалды интернет-портал іске қосылды. Бұл жоба ел экономикасын цифрландыру саясаты шеңберінде Үкіметтің және USAID агенттігінің қаржыландыруымен жүзеге асуда. Порталдың идеясы – еліміздегі барлық шаруа қожалықтары мен ауылдық округ­тер­дің, жүздеген аграр­лық ғалымдар мен сарап­шы­лардың, мыңдаған агро кәсіпорындардың бір­тұтас дерекқорын жасау.
Елбасы Н.Назарбаев «Қазақстанның Үшінші жаңғыруы: жаһандық бәсекеге қабілеттілік» атты Жолдауында «Әлемде кезекті, төртінші өнеркәсіптік революция басталды. Үкімет ІТ саласын дамыту мәселесін ерекше бақылауда ұстауға тиіс. Бұл – маңызды кешенді міндет. Аграрлық сектор экономиканың жаңа драйверіне айналуы тиіс. Әкімдер өңірлерде бизнес жүргізу үшін жағдайды жақсарту жөнінде нақты жоспарлар әзірлеу қажет» деген еді. Осы бағытта 2017 жылдың 16 қазанында Жамбыл ауданы әкімдігінің мәжіліс залында ауылдық округ әкімдері мен жергілікті фермерлерге арналған семинар-тренинг болып өтті.
Жобаның мақсаты – жергілікті фермерлердің шекарасыз ашық нарыққа шығуына қолайлы жағдай туғызу, шаруалардың өнімдеріне жан-жақты сұранысты арттыру, ең бастысы, делдалдардың жолын кесу. «Егер сіз интернетте жоқ болсаңыз, онда бизнесте жоқсыз» деген уақыт келді. Ашық база жоқ болғандықтан, фермерлер клиентті, ал клиент фермерді іздеп таппай жүр. Қазіргі күнде порталда 20000-дай шаруа қожалық бар және көптеген ауылдық округтер белсенді тіркелуде. Тіркелу – қарапайым, жылдам, тегін. Сайтқа тіркелгендердің телефон нөміріне немесе электрондық поштасына клиенттер шетелден де, жақын маңнан да делдалсыз хабарласып, өнімге тікелей тапсырыс бере алады. Осы мәселе бойынша ауылдық округтер мен шаруа қожалықтарын порталға тіркелуге шақырамыз.
* * *
Сайтқа тіркелу реті: сайттағы «зарегистрироваться» деген нүктені бассаңыз, анкетаның (веб-парақша) дайын шаблоны шығады. Соны қазақша немесе орысша, өзіңіз қалаған тілде толтырсаңыз, жарнама-хабарламаларыңыз портал бетінде автоматты түрде сол мезетте жарияланады. Қосымша тауарлар мен көрсететін қызметтеріңіздің суреттері мен видеоларын да жүктеуге болады. Ресми құжаттар мен реквизиттерді сайтта тіркеу, көрсету міндетті емес. Ауылдағы кәсіпкерлердің, шаруа қожалықтарының агросекторға тікелей немесе жанама қатысы болуы шарт. AgroBiz.kz-те ашқан веб-парақшадағы (аккаунт) мәліметтерді өзгертіп тұру не түбегейлі өшіріп тастау әркімнің өз еркінде. Әркімнің жеке паролі мен логины болады.
* * *
Интерактивті агрокарта – сайтқа тіркелген фермерлердің орналасқан жері көрініп тұрады. Ол сіз тұрған жерден екінші бір фермерге дейін қанша шақырым, көлікпен қанша уақыт жүретініңізді және қанша жанармай шығындайтыныңызға дейін санаулы секундта есептеп береді.
«Фермерлер каталогы» – мыңдаған қазақстандық шаруа қожалығының біртұтас дерекқоры.
«Агрокәсіпорындар каталогы» – жүз­деген отандық әрі шетелдік кәсіпорындар, компаниялар, қаржылық, мемлекеттік агроұйымдар (фермерлерге жаңа техно­логиялар мен тауарлар, қызметтер ұсынады).
«Ауылдық округтер каталогы» – жергі­лікті әкімшіліктер өз өңірінің аграрлық әлеуетін енгізетін бөлім. Мақсаты – тұрғы­лықты фермерлермен байланысты жеңілдету әрі елді мекенге сырттан инвестиция тарту.
«Агроғалымдар каталогы» – агросектордағы ғалымдар, эксперт-мамандар ғылыми жұмыстарын, тауары мен қызметін жариялайтын алаң. Тікелей хабарласып ғылыми ақыл-кеңес сұрауға болады.
Электрондық қызметтер – агросекторға қатысты мемлекеттік түрлі анықтамалықтар, құжаттар, лицензия, сертификаттарды алу үшін электрондық Үкімет сайтының керекті парақшаларына тікелей шығасыз.
Вакансия-Резюме – агро салада жұмыс іздеушілерге немесе жұмысшы, маман іздегендерге арналған.
Агротендер – ауылшаруашылық тауарын өндірушілер түрлі тендерлерге тікелей қатысу үшін.
Ауа райы – Қазақстандағы әрбір аудан орталығы мен қалалардың күнделікті ауа райы жарияланып тұрады.
Сайтта қарапайым адамдар да ауыл шаруашылығына қатысты тегін жарнамалар жариялай алады.
Субсидия және несие алу жолдары мен ережелері, агросекторға қатысты шұғыл ақпараттар, сараптамалық мақалалар, сұхбаттар, ғылыми жаңалықтар, тегін әрі дайын бизнес-жоспарлар мен бизнес-идеялар да осы порталда.

Айдос АМАНБАЙ,
«Agrobiz.kz» порталының жетекшісі.

E-mail: Этот адрес электронной почты защищен от спам-ботов. У вас должен быть включен JavaScript для просмотра.
Ұялы тел.: 87775138782, 87016138782.

Бөлім:  Кәсіпкерлік
Сәрсебі, 18 Қазан 2017 00:00

Жұмыс нәтижесін беруде

Ауданда ХХІ ғасырдың қасіретіне айналған сыбайлас жемқорлықпен күрес тұрақты жүргізіліп келеді. Соның нәтижесі болар, бүгінде бұл індетке бой алдыратын азаматтардың қатары сиреген. Тәуелсіз Қазақстанның баянды болашағына алаңдаған Елбасы Нұрсұлтан Назарбаев сыбайласттыққа қарсы күресті күшейту мақсатында арнайы заң қабылдап, түрлі бағдарламаларды дүниеге алып келді. Ал, ауданда келеңсіз көрініске қарсы мәдениетті қалыптастыру мақсатында арнайы мобильдік топ құрылып, іске белсене кіріскен.
Бүгінде аталмыш топ ауданға қарасты ауылдық округтерде түсіндіру жұмыстарын жүргізуде.
– Елбасы Нұрсұлтан Назарбаевтың «Бет жүзіне, лауазымына қарамай, сыбайлас жемқорлыққа қарсы ымырасыз күрес жүргізу қажет. Бүкіл халық болып мұндай індетке қарсы тұруымыз керек. Бұл – әрбір адамның азаматтық парызы» деген сөзі әр қазақстандықтың ұраны болуы керек деп ойлаймын. Еліміздің әлеуметтік-экономикалық дамуына кері әсерін тигізетін кеселмен күрес – әр азаматтың міндеті. Біздің мобильдік топ мүшелері осыны ұдайы ауыл тұрғындарының назарына салып келеді,  – дейді кезекті сапарға кетіп бара жатқан аудан әкімі аппараты мемлекеттік-құқықтық жұмыс бөлімшесінің басшысы, топ жетекшісі Жомарт Телеуов.

Мақсат ЖҰМАБАЕВ, «Шұғыла».

Сәрсебі, 18 Қазан 2017 00:00

Азаматтық танытты

Табиғаттың тосын сыйын болжап біле алмайсың. Биылғы көктем айында еріген қардың әсерінен аудандағы біраз елді мекендерге су жайылғанын көргенбіз. Дәл осындай қауіп Қаратөбе ауылдық округіне қарасты Бектөбе ауылына да төнген. Ауылдың оң жақ тұсындағы үлкен канал жауынның әсерінен арнасынан асып, ауылдың ішкі көшелеріне су жайылған болатын. Осындайда ақ ниет пен еш риясыз, алғыс алуды ғана көздеген «Амангелді» өндірістік кооперативінің басшысы Қасымхан Қанаев пен «Жақсынбет» шаруа қожалығының басшысы Серік Халықов арамыздан табылды. Жомарт жандар өз техникаларымен канал жағасын ретке келтіріп, төнген қауіпті сейілткен еді. Сонымен қатар өздерімен бірге ерте келген ауыл азаматтары да бар көмегін аямай, көптің алғысына бөленді.
Қоғамда осындай абзал азаматтардың бары қуантады және олардың әрбір жасаған игі ісі баршаға үлгі болса дейміз.
Асқат САРШАЕВ,
Қаратөбе ауылдық округі әкімінің орынбасары.

Бөлім:  Қайырымдылық

Қай дәуірге аяқ бассақ та білімді болу, біліміңді үнемі жетілдіру мәселесі алдыңғы қатарда тұратыны сөзсіз. Тек білімді адам ғана қоғамның алдыңғы қатарлы өкілі бола алады. Қазіргі таңда өзіңнің мақсатыңа жету үшін күн сайын санаңды жетілдіріп отыру керек. Тек экономика саласында ғана емес, рухани жағынан да даму – әрқайсымыздың міндетіміз. Елбасы Нұрсұлтан Назарбаев өзінің «Болашаққа бағдар: рухани жаңғыру» атты бағдарламалық мақаласында осы мәселеге ерекше мән берді. «Табысты болудың ең іргелі, басты факторы білім екенін әркім терең түсінуі керек. Жастарымыз басымдық беретін межелердің қатарында білім әрдайым бірінші орында тұруы шарт. Себебі, құндылықтар жүйесінде білімді бәрінен биік қоятын ұлт қана табысқа жетеді», – деп атап өтті.
Расында, еліміздің баянды болашағы – білімді жастардың қолында. Сондықтан жалынды жастарды жігерлендіріп, болашағына дұрыс бағыт-бағдар беру – әрбір азаматтың міндеті.
Жуырда Елбасы Нұрсұлтан Назарбаевтың бағдарламалық мақаламасынан туындаған міндеттерді жастарға түсіндіру мақсатында Шайқорық орта мектебінде «Жаңғырудың жарқын жолы – жастардың қолында» атты аудандық акция өтті. Аудан әкімдігі білім бөлімі ұйымдастырған акцияның шымылдығы Мемлекеттік Әнұранмен түрілді.
Облыс әкімдігі білім басқармасының бөлім басшысы Гүлзира Дәрібаева, облыс әкімдігі ішкі саясат басқармасының талдау және мониторинг бөлімінің басшысы Айбек Әжібаев, «Нұр Отан» партиясы аудандық филиалының консультанты Төленді Көпбергенов пен ауданға қарасты білім беру мекемелерінің ұстаздары мен белсенді оқушылары қатысқан жиында әуелі аудан әкімдігі білім бөлімінің басшысы Раушан Қожамжарова сөз алып, Елбасы мақаласының мәнін жастарға ұғынықты тілде жеткізді.
– Мемлекет басшысы біртұтас ұлт болу үшін болашаққа қарқынды қадам басуда және бұқаралық сананы өзгертуде жастарға үлкен үміт артып отыр. Осы мақсатта ұйымдастырған мұндай айтулы шарадан әрбір белсенді жас қалыс қалмауы қажет, – деді бөлім бас­шысы. Ал, Гүлзира Дәрібаева: «Білімді ұрпақ – болашақтың кепі­лі» деп қазақ атамыз айтқандай, қазіргі таңда білімді ұрпақ өсі­ру – мемлекетіміздің басты саяса­тының бірі. Білімсіздің күні қа­раң. Көзі ашық, көкірегі ояу кез кел­ген білімді ұрпақ өз Отанының дамуы жолында аянбай тер төгеді. Қазіргі бой жарыстыратын емес, ой жарыстыратын заманда құр жа­тудың өзі әбестік. Жалын мен жігерді, ізденіс пен талпынысты талап ететін жастық шақта ел болашағы үшін еңбек ету – әркімнің міндеті», – деп, бағдарламалық мақала бойынша тағылымды сөз қозғады.
Жиында Айбек Әжібаев облыста Елбасының бағдарламалық мақаласы аясында атқарылап жатқан жұмыстар жайында баяндап, оған белсенді жастар қолдау білдіріп жатқанын жеткізсе, Төленді Көпбергенов ел үміт артқан өскелең ұрпақтың білімді, тәрбиелі болып өсуі ұстаздарға байланысты екенін алға тартып, ауқымды іс-шараны ұйымдастырған білім бөлімінің ұжымына алғысын білдірді.
Аудан деңгейінде ұйымдастырылған шараның қызықты өтуіне бар күш-жігерін салған өнерлі өрендер ән айтып, күй тартып, би биледі.
Акция соңында белсенді жастар диплом және бағалы сыйлықтармен марапатталды.

Нұрасыл СҰЛТАНБАЕВ.
«Шұғыла».

Елбасы Нұрсұлтан Назарбаев «Болашаққа бағдар: рухани жаңғыру» атты бағдарламалық мақаласында: «Біріншіден, қазақ тілін біртіндеп латын әліпбиіне көшіру жұмыстарын бастауымыз керек. Біз бұл мәселеге неғұрлым дәйектілік қажеттігін терең түсініп, байыппен қарап келеміз және оған кірісуге Тәуелсіздік алғаннан бері мұқият дайындалдық» деп айтқан еді. Қазіргі таңда тіл саласының білікті мамандары латын қарпіне негізделген қазақ әліпбиін қызу талқылауда ойларын да айтып бөлісуде.
Апта аяғында аудан әкімдігі «Жастар ресурстық орталығының» мәжіліс залында облыс әкімдігінің тілдерді дамыту басқармасы мен «Жамбыл облыстық қоғамдық бақылау және мониторинг орталығы» қоғамдық қоры және аудан әкімдігі ішкі саясат бөлімінің бірлесіп ұйымдастыруымен «Латын әліпбиі – бірегейлік пен жаңғыру негізі» атты облыстық акция өткізілді. Оған аудандағы мемлекеттік қызметкерлер мен белсенді жастар қатысты. Оларға А.Байтұрсынов атындағы тіл білімі институтының бөлім меңгерушісі, қазақ тілін латын әліпбиіне көшіру бойынша республикалық жұмысшы топтың мүшесі Назира Әміржанова қазақ тілін латын әліпбиіне көшіру бойынша тарқата түсіндіріп, латын қарпіне ауысудың маңыздылығына кеңінен тоқталды. Латын графикасына негізделген қазақ әліпбиінің жаңа нұсқасы жайында келелі әңгіме өрбітіп, әріптердің жазылу және оқылу тәртібі туралы егжей-тегжейлі баяндады. Латын әліпбиіне көшу – ұлтымыздың санасын бұғаудан босататынын, түркі және жаһандық әлеммен ықпалдасуға, қазақ халқы ертеден қолданған әліпбиімізге қайта оралып, ұлттық санамыздың қайта жаңғыруына жол ашатынын айтты.
Қазақ тілінің латын әліпбиіне көшуі сөз болған акцияны аудан әкімдігі ішкі саясат бөлімінің бас маманы Бақытжан Құтжан қорытындылады.

Ильяс Қалыбеков,
«Шұғыла».

Жамбыл облысы 8 балға дейінгі сейсмикалық аймақта орналасқандықтан, аймақтағы жойқын жер сілкінісінің залалын төмендету бойынша жұмыстар жүргізілуде. Соның бірі – ауданға қарасты Қаратөбе ауылдық округінде «Жамбыл облысындағы жойқын жер сілкінісі салдарынан туындаған төтенше жағдайларды жою кезіндегі іс-қимылдарға басқару органдарын және азаматтық қорғау мемлекеттік жүйесінің күштерін дайындау» тақырыбында өткен «Жер-2017» республикалық командалық-штабтық оқу-жаттығуы.
ҚР Ішкі істер министрлігінің бөлімшелері, орталық және жергілікті атқарушы органдар, авариялық-құтқару қызметтері мен құрамалары, Жамбыл облысының азаматтық қорғау қызметтері, ҚР Қорғаныс министрлігінің әскери бөлімдері қатысқан республикалық оқу-жаттығуда әуелі облыс әкімінің бірінші орынбасары Бекболат Орынбеков пен ҚР Ішкі істер министрінің орынбасары Ю.Ильин дайындық барысын бақылып, қатысушыларға сәттілік тіледі. Айта кету керек, бұл маңызды шараға аудан әкімінің орынбасары Ерлан Қыдыралыұлының басшылығымен ауданымыздың барлық жауапты мекемелері қатысты.
Оқу-жаттығу екі кезеңде өрбіді. Бірінші кезеңінде ҚР Білім және ғылым министрлігінің Сейсмология институтынан жойқын жер сілкінісінің қаупі туралы мәлімет алынды. Осы болжамның негізінде республикалық штаб халықты құлақтандыру туралы, жер сілкінісі салдарын жою бойынша жұмыс тәртібі және көлемі туралы, қойылған міндеттерді орындау үшін бөлінген күштердің саны және құрамы туралы шешім қабылдады.
Екінші кезеңде ТЖК, орталық және жергілікті атқарушы органдардың жедел топтары бағдарлау және жағдайды бағалау жұмыстарын жүргізді.
Оқу-жаттығу өткізу барысында құтқарушылар өрт ошақтарын сөндіріп, үйінділерді бөлшектеді. Кинология қызметі арнайы үйретілген иттермен зардап шек­кендерді іздеп, оларды құтқарды. Сонымен қатар, газбен жабдықтау, электр жарығын беру және байланыс желілерін қалпына келтіру жұмыстары да тиянағын тапты.
Екі күнге жоспарланған республикалық оқу-жаттығу жоғары деңгейде өтті.

Нұрасыл СҰЛТАНБАЕВ,
«Шұғыла».

Бөлім:  Саясат
Бет 1 -ші 4 беттен

Серіктестер